20 Атырдьах ыйа 20.08
  • 13°
  • $ 59,13
  • 59,39

Сунтаар Хаданыгар Шерхан уонна маугли Саҥа дьыллыы кэллилэр

11:12, 29 декабря 2021
Текст:

Сунтаар улууһун Хадан нэһилиэгин ыччатын лидера Илья Иванов бэйэтин инстаграм-сирэйигэр @khadansky_official аҕата Иванов Иннокентий Петрович Саҥа 2022 сылы көрсө хаарынан «Шерхан уонна маугли мультик геройдара Сунтаар улууһугар» диэн композиция оҥорон саҕалаабытын видеоҕа устан таһаарбыта. Онтон бу бэҕэһээ хаар кыыллар хаартыскалара социальнай ситимнэргэ тарҕанна.

Ильяҕа төлөпүөнүнэн сибээскэ таҕыстыбыт. Кини маннык кэпсээтэ:

— Аҕам бастакы хаар оҥоһугун оскуолаҕа үөрэнэ сылдьан дьүһүйэн боруобалаабыт. Кэлин биһиги дьыссаакка сылдьар кэммитигэр, 90-с сыллартан, күүскэ дьарыктаммыта. Саҥа дьыл чугаһаабытын тиэргэммиттиттэн билэрбит. Куобахтар, саһыллар, эһэлэр мусталлара. Ол үгэһин билиҥҥэ диэри илдьэ сылдьар. Ис дууһатыттан, оҕолорбор, сиэннэрбэр, биир дойдулаахтарбар диэн анаан оҥорор.

«Шерхан уонна маугли” мультик геройдара ыал тиэргэнин иһигэр кэккэлээбиттэр. Ким баҕалаах кэлэн хаартыскаҕа түһэрэ көҥүл.

Иннокентий Петрович хаар оҥоһуктарга сакаас ылбат. “Ыҥырыынан оҥорбот. Тоҕо диэтэр өр тохтобул кэнниттэн, дьэ ылсан эрэр. Уруккутун курдук түргэн буолбатах билигин. Киһи сааһыран истэҕин аайы бытаарар, аны икки илиитигэр эчэйиилээх. Биэнсийэлээх. Дьон аҕам оҥоһуктарын үчүгэйдик сыаналыыллар, ол үөрдэр. Интернет ситимнэригэр суруйдахтарына, аҕабар барытын аахтарабын. Олуһун диэн үөрэр”, — диэн кэпсээтэ эдэр киһи.

Илья аҕатынан киэн туттарын, кини курдук күүстээх санаалаах буолуу наадатын, биэс бииргэ төрөөбүт уолаттарыгар аҕалара мотиватор буоларын кэпсээтэ.

Иннокентий Петрович Ньурба улууһун Антоновкатыгар олорор иккис уола Артем Иванов эмиэ сыл ахсын хаар оҥоһуктары тэрилтэтин тиэргэнигэр оҥорор. “Саханефтегазбытка” үлэлиир. Кини быйылгы оҕолордоох тигра куйаар ситиминэн күүскэ тарҕаммыта.

Илья иһитиннэрбитинэн, «Шерхан уонна маугли мультик геройдара Сунтаар улууһугар» диэн композиция Сунтаар улууһугар ыытыллар “Аҕа уонна оҕо” куонкуруска кыттар.

СИА редакциятын аатыттан Иннокентий Петровичка уонна кини уолугар Иннокентийга куонкуруска ситиһиини баҕарабыт.

Следите за самым важным и интересным в Telegram-канале и WhatsApp-группе ЯСИА
26
0