Кэлэр сылга Саха сиригэр социальнай үлэһиттэргэ аналлаах сыһыарыы баар буолуоҕа. Ол туһунан үлэ, социальнай сайдыы миниистирин солбуйааччы Афанасий Постников иһитиннэрдэ.
Кини этэринэн, социальнай үлэһиттэр түбүктээх үлэлэрин чэпчэтэр сыалтан, оҥорбут өҥөлөрүн төлөпүөҥҥэ, планшекка киллэриэхтэрэ. Түргэнник быһаарыы ылынарга, көдьүүстээхтик салайарга мобильнай сыһыарыы көмөлөһөр.
— 2023 сылга министиэристибэ социальнай хааччыйыы эйгэтигэр өҥөнү оҥорууну сайыннарар уонна сыыппара технологияларын киэҥник киллэрэр сыаллаах-соруктаах. Инбэлиит дьону кэлимник эмтииргэ, чөлүгэр түһэрэргэ оҥоһуллар өҥө учуота автоматизацияланыаҕа. Хаайыыттан босхоломмут дьоҥҥо көмөлөһөргө, араас тэрээһиннэри ыытарга биир информационнай систиэмэ оҥоһуллуоҕа. Ону тэҥэ, олорор дьиэҕэ наадыйар дьон испииһэгин кэҥэтиэхпит, сүрүн болҕомто тулаайах уонна көрүүтэ-истиитэ суох хаалбыт оҕолорго туһаайыллыаҕа, — диэн миниистири солбуйааччы эттэ.
Ааптар: Ангелина Васильева, Саха сирэ сайт
