2022 сылга Саха сиригэр бастакынан арыллыбыт ойуур питомнигар икки сыллаах маһы олордуу саҕаланар. Өлүөхүмэ улууһун Солянкатыгар үлэ былааннаахтык барар.
Ил Дархан пресс-сулууспата иһитиннэрбитинэн, бырайыагы олоххо киллэрии Саха сирин ойуурун чөлүгэр түһэриигэ саамай суолталаах дьаһал буолар.
Питомник уопсай иэнэ 4,2 гектар, оҥорон таһаарар күүһэ 3 мөл мас аһаҕас буорга уонна 140 тыһ — сабыылаах сиргэ. Теплица иэнэ 400 кв.м, маны сэргэ 3,67 гектар бааһына көрүллэр.
Икки-үс сылынан бастакы түмүктэр тахсыахтара диэн исписэлиистэр этэллэр.
Санатар эбит буоллахха, бырайыак 2020 сыллаахха АГАТУ уонна Өлүөхүмэ улууһун дьаһалтатын бииргэ үлэлээһиҥҥэ сөбүлэҥнэригэр олоҕуран саҕаламмыта, суруйда «Өлүөхүмэ» хаһыат.
