Урукку сылларга СӨ Үлэ уонна социальнай сайдыы министиэристибэтин үлэһиттэрин олохтоохтор араас чэпчэтии, өйөбүл, көмө боппуруостарынан «көмөн» кэбиһэллэрэ. Оттон быйылгы ситэриилээх былаас отчуотугар бу министиэристибэ бэрэстэбиитэлигэр, демография уонна дьиэ кэргэн бэлиитикэтин, эпиэкэ департаменын салайааччытын солбуйааччы Сардаана Самсонова сылдьыбыт Төрүт, Өймөкөөн, Сордоҥноох, Үчүгэй, Томтор нэһилиэктэригэр биир да боппуруос киирбэтэ.
Бу төрүөтүн туһунан Сардаана Самсоноваттан аара айаннаан иһэн ыйыппыппар маннык хоруйдаата:
— Дойдуга буола турар балаhыанньа арҕааҥы дойдулар дьайыыларыттан тутулуктанан, олоххо-дьаһахха үгүс уустуктар көстөллөрө баар суол. Ол эрээри Өймөкөөн улууһун олохтоохторо, ону ол диэбэккэ, санаалара бөҕөх эбит. Кинилэр боппуруостарын сүрүннээн улуустарын сайдыытыгар туһаайдылар.
Мин үлэбинэн дьону кытта биирдиилээн сирэй көрсөн, Ил Дархан, Бырабыытылыстыба оҕолоох дьиэ-кэргэттэргэ, чуолаан элбэх оҕолоох ыал олохторо-дьаhaхтара тупсарын туhугар ыытар араас хайысхалаах үлэтин сырдаттым, саҥа киирбит өйөбүллэри сиһилии быһаардым. Нэhилиэнньэ улуустааҕы социальнай управление нөҥүө көрүллэр араас төлөбүрдэри бигэргэтиллибит ирдэбиллэри тутуһан үлэлии олороро харахха быраҕыллар. Биир даҕаны үҥсүүнү истибэтим. Бу көстүүнү улуустааҕы социальнай харалта управлениетын салайааччыта Парасковья Аммосова миэстэтигэр ыытар үлэтин бастыҥ холобурун быһыытынан сыаналаатым.
Үс нэһилиэккэ Үлэ министиэристибэтин аатыгар биир да боппуруос киирбэтэх буоллаҕына, Томторго бэйэ-бэйэлэриттэн истиһэн, бэрт элбэх киһи суруттаран, күнүс 12 чаастан отчуот 17 чааска саҕаланыар диэри дьон субуллан олордо.
Ол оннугар мунньах кэмигэр олохтоохтортон эмиэ биир да боппуруос киирбэтэ. Онон отчуот иннинэ дьону кытта сирэй көрсөн, кинилэр кыһалҕалаах боппуруостарын быһаарыы, сүбэ-ама биэрии тустаах үлэ биир олус туһалаах көрүҥэ эбит. Бары боппуруостар олохтоохтук быһаарыллан, дьон олорор кэбиниэппиттэн санаата көтөҕүллэн тахсар.
… Дьону кытта кэпсэтэр кэмигэр Сардаана Васильевна министиэристибэтин тутаах испиһэлииһиттэн дьонтон киирбит боппуруостары тута быһааран биэрэригэр көрдөһөр. Онон куйаар нөҥүө кэпсэтии эмиэ барда. Министиэристибэ үлэһиттэрэ сарсыардаттан киэһээҥҥэ диэри өрөспүүбүлүкэ улуустарынан отчуокка сылдьар кэллиэгэлэрин кытта быһа холбонон үлэлии олордулар. Онон ситэриилээх былаас отчуоттарын саҕаланыахтарыттан сырдатар суруналыыс буоларым быһыытынан, үлэ бу көрүҥүн сонун көстүү быһыытынан олус кэрэхсээтим.
Отчуот түмүктэниитэ СӨ Үлэ уонна социальнай сайдыы министиэристибэтин демография, дьиэ кэргэн бэлиитикэтин уонна эппиэкэ дэпэртээмэнин салайааччытын солбуйааччы Сардаана Самсоноваттан санаатын үллэстэригэр көрдөстүм.
Ааптар: Елена Потоцкая, «Саха сирэ» хаһыат
