Устудьуон быраактыката билим түөрүйэтин дьиҥ олоххо киллэрии. Ону тэҥэ саҥаны арыйарга кыах бэриллэр. СИА бүгүҥҥү «Сахалыы АСМР» рубрикатыгар хоту улууска быраактыкалана сылдьар устудьуон-геолог Константин Бабанов.
Кини күннүгүттэн үллэhиннэ:
— Арктика айылҕата сөхтөрбүтэ. Мин күн аайы көрөр айылҕабар майгыннаабат. Үрдүк хайалар, таастаах эниэлэр, киэҥ хочолор букатын атын дойдуга сылдьар курдук сананаҕын. Халлаан былыта да көстүүнү өссө сүдү оҥорор. Эрдэ хаартыскаҕа эрэ көрбүт буоллахпына, илэ көрөр олус уратылаах.
— Быраактыкаҕа тугу гынаҕыт?
— Биһиги сир геологическай тутулун үөрэтэбит, маршруттарынан сылдьабыт, боруода холобурдарын хомуйабыт уонна полевой усулуобуйаҕа үлэлииргэ үөрэнэбит. Бу үөрүйэх аудиторияҕа олорон үөрэнэртэн ураты — сыаналаах уопут — буолар. Билигин мин талбыт идэм сөптөөҕөр өссө эрэнэбин. Быраактыка геолог үлэтэ төһө интэриэһинэй, эппиэттээх уонна элбэх өрүттээх буолуон сөбүн көрдөрдө.
Салгыы Константин күннүгэр киллэрбит хоту дойду айылҕатын тыаһын-ууһун истиҥ, кэрэтин көрүҥ.
