Саха ынаҕын иитиэн баҕалаах киһи элбээтэ. Бу хайысханан “Агростартап” судаарыстыбаннай бырагыраамаҕа кыттааччы ахсаана сылын аайы эбиллэр. Сөптөөх технологияны тутуһан, бородууксуйаны оҥорон таһаардахха, улахан харчыга туруон сөп. Аны кэлиҥҥи кэмҥэ саха сүөһүтүттэн ылыллар бородууксуйа эмтээҕэ бэлиэтэннэ. Ол туһунан элбэх сурулунна.
Ил Дархан Айсен Николаев 2024 сылга саха боруодатын ыанар ынаҕын ахсаанын 1000 тириэрдиэхтээхпит диэн сорук туруорар. Онон “сүтэн эрэр” статустаах бэйэлээх бэйэбит сүөһүбүтүн чөл туруктуурга күүстээх үлэ барар диэн этиэххэ наада.
2019 сыллаахха «Саха сүөһүтэ» тэрилтэ үлэтин саҕалаабыта. Салайааччыта Артемьев Александр Еремеевич. Киниэхэ тиийэ сырыттым. “Агростартапка” кыттаары бэлэмнэнэ сылдьар дьон ыйытыыларыгар хоруй ылаары.
Саха ынаҕын иитээри гынабын. Хантан атыылаһыахпын сөбүй? Хас да базовай хаһаайыстыба баар дииллэр. “Якутский скот” тэрилтэ атыылыыр дуо? Бизнес-былааммар грант харчытын тыырыытын оҥорорбор көрдөрөөрү гынабын.
— Саха сиригэр саха сүөһүтүн уопсай төбөтүн ахсаана — 2500, онтон ыанар ынаҕа – 900-чэ. Бу ахсаантан “выборка” диэн баар буолар. Уопсайынан, 1000-лаах киирбиини ылыы олус уустук, — диэтэ Александр Еремеевич. Кини эппитинэн, “Саха сүөһүтэ” тэрилтэ ынах атыылаабат. Племенной хаһаайыстыба буолар.
Саха сиригэр 7 базовай хаһаайыстыба баар. Кэпсэтэ сылдьыбыт фермердэрим эдэрдэргэ сүбэ биэрэргэ бэлэмнэр. “Эрийээччилэр, билэллэр биһигини”, — диэтилэр.
Мэҥэ Хаҥалас Чүүйэтигэр Дмитриев Аркадий Николаевич
Үөһээ Бүлүү Кырыкыйыгар Семенов Виктор Афанасьевич
Амма Эмиһигэр бааһынай хаһаайыстыба
Горнай Кэптинигэр «Сылгыһыт» СПОК
Сунтаар Элгээйитигэр «Эльгяйское» б/х
Таатта Томторугар «Байаҕантай» ТХПК
Хаҥалас Улахан Ааныгар Иванов Анатолий Семенович
