29 Сэтинньи 29.11
  • -33°
  • $ 60,75
  • 63,3

Саха театральнай ускуустубата – ыччат өйүн-санаатын уһугуннарар тыыннаах эйгэ

2022 сыл сэтинньи 23 күнүгэр СӨ култууратын уонна духуобунай сайдыытын министиэристибэтин көҕүлээһининэн Саха театрын лабораторнай саалатыгар күнүс 15:00 чаастан Саха тылын, литературатын уонна култууратын учууталларын II өрөспүүбүлүкэтээҕи сийиэһин чэрчитинэн стратегическай сессия ыытыллара былааннанар.

Сахабыт сирин саргытын салайсар төрөөбүт тыл, литература уонна төрүт култуура учууталлара! Эһиги кэлэктиипкит, нэhилиэккит уонна улуускут педагогическай общественноhын итэҕэлин ылан, дэлэгээт аатын сүкпүккүтүнэн истиҥник эҕэрдэлиибит. Итиэннэ түөлбэ таһымыгар көҕүлээччи, салайааччы уонна холобур буолар дьоҥҥо биһиги, култуура уонна национальнай ускуустуба эйгэтин үлэһиттэрэ, улахан эрэллээхпитин биллэрэбит.

Саха национальнай театрдара духуобунай киин быhыытынан ыччат өйүн-санаатын уһугуннарар сахалыы төрүт эйгэни олохтоһоллор. Бу кэскиллээх хайысханы кэҥэтэргэ уонна аныгы кэм сиэринэн саҥалыы тэрийэргэ хас биирдии үөрэх тэрилтэтин кытта быстыспат ситим олохтоноро ирдэнэр. Маныаха «тыл – литэрэтиирэ – театр» диэн олохсуйбут тиһигинэн үүнэр көлүөнэни национальнай театр ускуустубатыгар уонна төрүт өйгө-санааҕа туһаайары сөптөөҕүнэн ааҕабыт.

Ити үрдүк соруктары ситиһэр сыалтан биэс сылга биирдэ буолар киэҥ ыҥырыылаах түмсүүгэ «Саха театральнай ускуустубата – ыччат өйүн-санаатын уһугуннарар тыыннаах эйгэ» диэн стратегическай сессияҕа учууталлар санааларын истэн, кинилэри кытта бииргэ үлэлэһэр суоллары тобулуохтаахпыт. Сонун көрүүлэр, сэргэх этиилэр түмүллэн, инникитин Саха Өрөспүүбүлүкэтин култууратын уонна духуобунай сайдыытын министиэристибэтин иһинэн «Саха ускуустубата – оҕолорго» диэн бырайыакка кубулуйарын ситиһиэхтээхпит.

Күндү доҕоттор! Сийиэс дэлэгээттэрин саха театральнай ускуустубатын тэрилтэлэрин кытта ыкса алтыһарга, ситими олохтуурга сонун уонна сэргэх ньымалары тобуларга ыҥырабыт.

П.А. Ойуунускай аатынан

Саха академическай театрын

пресс-сулууспата

Следите за самым важным и интересным в Telegram-канале и WhatsApp-группе ЯСИА
1
0