Театры таптааччылар олунньу 19-20 күннэригэр Андрей Борисов туруоруутугар Баһылай Харысхал историческай драматынан «Тэпсиллибэтэх үтүө аат» («Три реалиста») испэктээкили көрүөхтэрэ.
Саҥа туруоруу Саха театрын 110 сыллаах юбилейдаах сезонугар анаммыт испэктээкиллэр серияларын арыйар. Андрей Борисов уонна Харысхал саха норуотун уһулуччулаах уолаттарын үйэтитэр испэктээкиллэринэн биллэллэр. «Хайаан да эргиллиэм» (Манньыаттаах Уола), «Бастыҥ хатыыта» (Василий Никифоров-Күлүмнүүр») уонна «Көмүөл» (Ксенофонтовтар дьиэ кэргэттэрэ) историческай испэктээкиллэр көрөөччүлэр биһирэбиллэрин ылбыттара.
«Тэпсиллибэт үтүө аат» уһулуччулаах судаарыстыбаннай деятель Илья Винокуров дьылҕатын кэпсиир. Манна даҕатан эттэххэ, Саха Өрөспүүбүлүкэтигэр соторутааҕыта Илья Винокуров төрөөбүтэ 120 сыла киэҥник бэлиэтэннэ. Саха норуота Илья Егорович Аҕа дойду Улуу сэриитин кэмигэр бар дьонун аччыктааһынтан быыһаабытын, Н.Неустроев, Алампа, Өксөкүлээх Өлөксөй, Г.Башарин сырдык ааттара төннөрүгэр өҥөтүн умнубат.
Испэктээкилгэ Илья Винокуров оруолун Россия үтүөлээх артыыһа, Саха Өрөспүүбүлүкэтин народнай артыыһа Анатолий Николаев толоруоҕа.
Сүрүн оруолларга Степанида Борисова, Ефим Степанов, Иза Николаева, Елена Сергеева-Румянцева, Петр Баснаев, Кирилл Семенов, Дмитрий Михайлов, Айаал Аммосов, Иннокентий Луковцев, Руслан Тараховскай, Александр Борисов, Дмитрий Татаринов, Роман Дорофеев уонна театр бары көлүөнэ артыыстара оонньуохтара.
