24 От ыйа 24.07
  • 16°
  • $ 87,3
  • 95,46

Саха театра кулун тутар 24 күнүгэр кэпсэтии түһүлгэтигэр ыҥырар

12:19, 23 марта 2022
Читайте нас на
Яндекс Новости
ЯДВ

П.А. Ойуунускай аатынан Саха академическай театра «Тыл – литература – тыйаатыр» тиһигинэн сонун үлэни былааннаан ыытар. Ол курдук, ыччаты театрга эйгэлиир, эдэр көрөөччүнү иитэр сыаллаах, ону тэҥэ норуот өйүн-санаатын уһугуннарар хайысхалаах тэрилтэлэри түмэ тардар соруктаах араас тэрээһиннэри сүрүннүүр.

 Кулун тутар 24 күнүгэр бар дьоммутун, сахалыы эйгэни тэрийэр тэрилтэлэри, түмсүүлэри, бөлөхтөрү «Саха театра – ыччат төрүт өйүн-санаатын уһугуннарар духуобунай киин» диэн тиэмэлээх кэпсэтии түһүлгэтигэр ыҥырабыт. Киириитэ: көҥүл. Буолар сирэ: Саха театрын олоҥхо саалата, 2 этээс. Бириэмэтэ: күнүс 14.00 чаастан.

Аныгы тэтимнээх кэмҥэ ыччат өбүгэ тылыттан-өһүттэн, төрүт үгэстэн, сахалыы сиэртэн-майгыттан тэйэр куттала күн-түүн улаатар. Аан дойду цивилизацията үтэн киириитигэр, тастан кэлэр информация дэлэйбит кэмигэр сөптөөх суолу тутуһарга, элбэхтэн суолталааҕын таларга Саха театра сүҥкэн оруоллаах.

Кэпсэтиигэ кыттыһаллар: СӨ искусствотын үтүөлээх диэйэтэлэ, Саха театрын сүрүн режиссера Руслан Тараховскай, Алампа аатынан бириэмийэ лауреата, Саха театрын артыыһа, режиссер Роман Дорофеев уонна тыл, култуура, искусство, үөрэх, ыччат уонна суруналыыстыка эйгэтин үлэһиттэрэ.

Бэлиэтээн эттэххэ, кэпсэтиигэ этиллибит санаалар, этиилэр түмүллэн, «Саха театра – oҕолорго» диэн бырайыакка кубулуйан, сотору кэминэн олоххо ыпсар кыахтаныахтара. Маны таһынан тэрээһиҥҥэ кулун тутар уонна муус устар ыйдааҕы репертуар туһунан сэһэргэниллиэ, артыыстары кытта көрсүһүүлэри, маастар-кылаастары тэрийии болҕомтоҕо ылыллыа, оҕо уонна ыччат бөлөхтөрүн түмэлгэ сырытыннарыы, «Пушкин каартатын» туһанан, испэктээкиллэри көрдөрүү боппуруостара дьүүллэһиллиэ.

П.А. Ойуунускай аатынан Саха академическай театрын оонньууларыгар билиэттэри https://sakhatickets.ru/ сайтан онлайн ылыаххытын сөп. 14-22 саастаах ыччат дьон «Пушкин каартатын» туһанан босхо сылдьар кыахтаахтар. Каасса күн ахсын өрөбүлэ, тохтобула суох 10:00-18:00 үлэлиир. Билсэр төл: 34-13-31 (каасса), +7(968)150-56-02 администратордар.

 

П.А.Ойуунускай аатынан

Саха академическай театрын

пресс-сулууспата

Следите за самым важным и интересным в Telegram-канале и WhatsApp-группе ЯСИА