XIX өрөспүүбүлүкэтээҕи Олоҥхо Ыһыаҕын чэрчитинэн, от ыйын 3 күнүгэр Кэбээйи сэлиэнньэтин «Уһун Хонуу» былаһааккатыгар «Саха сирин улуустарын амтана» диэн ураты гастрономическай бырайыагы арыйыахтара. Тэрийээччилэр иһитиннэрэллэринэн, бырайыак аҥаардас ас-үөл тэрээһининэн эрэ муҥурдаммакка, хас биирдии улуус бэйэтин историятын ас амтанын, үгэс уонна олохтоох бородуукта нөҥүө көрдөрөр дьиҥнээх култуурунай каарта буолуоҕа.
«Регионнар историческай, култуурунай нэһилиэстибэлэрин, бэйэлэрин уратыларын харыстыырга, дьон кэмнэр ситимнэрин билэригэр, биһиги уопсастыбабытыгар мэлдьи суолталаах сыаннастары ис сүрэхтэриттэн ылыналларыгар наадалааҕы барытын оҥорорго кыһаллыахтаахпыт», — диэн дойду президенэ Владимир Путин бэлиэтээн турар.
Бырайыак сүрүн сыала — саха аһын-үөлүн арааһын, хас биирдии оройуон уратытын, айылҕатын баайын уонна баай этнокултуурунай нэһилиэстибэтин көрдөрүү.
Былаһаакка киинигэр «Саха сирин улуустарын амтана» диэн экспозиционнай остуол туруоҕа, онно хас биирдии оройуон 1-тэн 3-гэ диэри бэлиэ бүлүүдэлэри туруоруоҕа. Сүрүн сорук — ыалдьыттарга Саха сирин аһын арааһын амсайар кыаҕы биэрии.
Хас биирдии улуус бэйэтин гастрономическай «визитнэй карточкатын» — историяны, аһылык култууратын уонна олохтоох кыаҕы кытта ситимниир үгэс буолбут бүлүүдэтин билиһиннэриэҕэ. Кыттааччы 30 мүнүүтэлээх таһаарыыта сыанаҕа презентацияны, маастар-кылааһы, үгэстэр тустарынан кэпсээни уонна ыалдьыттары аһынан күндүлүүрү киллэрэр.
«Биһиэхэ маннык бырайыакка кыттыы улахан чиэс. «Саха сирин улуустарын амтана» — бу аҥаардас ас эрэ туһунан буолбатах, бу — өбүгэлэрбит үлэлэригэр, төрөөбүт дойдубут айылҕатыгар ытыктабыл, өйдөбүл. Саха аһа — бородууктаҕа, кэмҥэ, ыалдьытымсах буолууга сыһыан бүтүн философията. Олус суолталаах, бу философия саҥа көлүөнэлэргэ тыыннаах хаалан, хас биирдии ыалдьыкка өйдөнөрүн курдук», — диэн «Тыгын Дархан» ресторан шеф-повара Константин Матаннанов санаатын үллэстэр.
«Тыгын Дархан» бренд-шеф-повара Николай Атласов этэринэн, хас биирдии улуус — бэйэтин микрокилиимэтинэн, бородууктатынан, аһы-үөлү оҥоруутунан, астыыр үгэһинэн туспа, ити саха гастрономиятын күүһэ уонна уратыта буолар.
«Бырайыак биһиги аспыт-үөлбүт тыыннаах, элбэх өрүттээх култуура буоларын, сайдарын, ол эрээри силиһин-мутугун харыстаан илдьэ сылдьарын көрдөрөр кыаҕы биэрэр», — диэн Николай Атласов этэр.
Кыттааччыларга бүлүүдэни талыыга, экспозицияны оҥорууга, кэпсииргэ методическай сүбэлэр оҥоһуллубуттар. Бүлүүдэлэр историческай уонна култуурунай суолталарыгар ураты болҕомто ууруллубут.
Санатан эттэххэ, Ил Түмэҥҥэ Ил Дархан Айсен Николаев этиитигэр Култуура сылын сүрүн сыалларыттан биирдэстэринэн култуурунай-историческай нэһилиэстибэни харыстааһын.
