Саха Өрөспүүбүлүкэтин тырааныспар уонна суол хаһаайыстыбатын министиэристибэтэ иһитиннэрбитинэн, тырааныспар салаатын бары тэрилтэлэрэ уматыгынан хааччыллан, харгыһа суохтук үлэлииллэр.
Авиация, тимир суол, оптуобус, өрүскэ, ону таһынан паромунан туорааһыннар кыраапыктарынан айаны толороллор. «Дьокуускай – Аллараа Бэстээх» социальнай суолталаах хайысханан өрүһүнэн айан харгыһа суох ыытыллар. Бу хайысхаҕа үлэлиир теплоходтары тохтоло суох сапараапкалыырга анал уматыгынан хааччыйар ньыма бигэргэтиллибит.
Тырааныспар министиэристибэтинэн уматык балансыгар быыстала суох мониторинг тэриллибит. Министиэристибэ суһал ыстааба күн аайы таһаҕас тиэйиитин кыттыылаахтарын дьайыыларын сүрүннүүр. Ардах халааныттан эмсэҕэлээбит учаастактарга саахалы чөлүгэр түһэрэр үлэҕэ кыттар суол сулууспаларын үлэлэригэр хонтуруол олохтонно. Бу тэрилтэлэргэ уматыгы бастакы уочарат биэрэллэр.
