Саамай кэскиллээх бырайыак иитинэн икки хайысхалаах хотугулуу-илин тырааныспар көрүдүөрүн оҥоруохтаахтар. Соҕуруу өттүгэр Арассыыйа уонна Кытай икки ардыгар Дьэлиҥдэ –Мохэ аан дойдутааҕы пограничнай пуоһу туорааһын баар буолуохтаах.
Тутуу бастакы түһүмэҕэр чааһынай үбүлээччи пропуск пуунун оҥорон, өрүс терминалын тутуохтаах. Оттон «Саха сирин тимир суоллара» Сковородино – Рейново суолу уонна Рейново ыстаансыйаны оҥорон, 2027 с. уопсайа сылга 3 мөл. туонна таһаҕаһы тиэйиэхтээхтэр. Бастакы түһүмэххэ тимир суолунан өрөспүүбүлүкэттэн сылга контейнерынан 2,7 мөл. туонна таһаҕаһы таһыахтара. Ону таһынан, Амур өрүһү туоруур күргэ тутуллуохтаах, массыына уонна уу тырааныспара сылдьыахтаах. Тырааныспар саҥа көрүдүөрэ Саха сириттэн Кытайга быһа суолунан табаары таһаарарга тирэх буолуо.
Хотугу хайысханан Аллараа Бэстээхтэн Магадааҥҥа диэри тимир суолу тутуохтаахтар. Магадан уобалаһын дьаһалтатын кытта кэпсэтиинэн, тимир суол Охотскай муора пуордугар тахсыахтаах. Тимир суол Алдан өрүһү туораан, Хаандыгаҕа тиийдэҕинэ дьыл кэмиттэн көрөн тырааныспар хааччахтаныыта тохтоон, хоту табаары тиэйии төгүрүк сыл ыытыллыаҕа. Итиэннэ айылҕа баайын туһаҕа таһаарыы бүддьүөт араас таһымыгар эбии үбү-харчыны киллэриэ.
Онон хотугулуу-илиҥҥи көрүдүөр Саха сирин, Амурскай, Магаданскай уобалаһы Кытай провинцияларын уонна Азия, Чуумпу байҕал эрэгийиэнин кытта ситимнээн, Чуумпу уонна Хотугу муустаах байҕалга тахсар кыаҕы арыйыа. Оччотугар дойду хотугулуу-илиҥҥи эрэгийиэнин геополитиката, экэниэмикэтин сайдыыта саҥа таһымҥа тахсан, тырааныспар эрэ буолбакка, үп-харчы хамсааһына кытта сыыдамсыйыа, суруйда Саха парламент саайт.
