5 Бэс ыйа 05.06
  • 16°
  • $ 80,88
  • 87,1

Саха сирин парламена төрүт тылы үөрэтии тосхолугар этиилэри киллэрдэ

11:28, 03 ноября 2022
Текст:
Читайте нас на
Яндекс Новости
ЯДВ

Саха тылын, литературатын уонна култууратын үөрэтиигэ тосхол ылыллыаҕа. Өрөспүүбүлүкэҕэ суолталаах докумуон киириитигэр этиилэри уонна рекомендациялары Ил Түмэҥҥэ оҥордулар, суруйар СИА.

30 сыл анараа өттүгэр Саха сиригэр өрөспүүбүлүкэҕэ тыллар тустарынан сокуон ылыллыбыта. Ити кэмнэргэ национальнай оскуолалар тосхоллоро тахсыбыта, билигин бу докумуоҥҥа регион үөрэҕириитин систиэмэтэ олоҕурар.

Билиҥҥи өйү-санааны, толкуйу учуоттаан, тосхолу саҥардарга быһаарылынна.

«Өрөспүүбүлүкэҕэ элбэх киһи бэйэтин төрүт тылынан саҥарара аҕыйаата. Хомойуох иһин, бу учууталлар уонна үөрэх эрэ кыһалҕата буолбатах, хас биирдии төрөппүтү эмиэ таарыйар. Ити эрээри тыа сиригэр үөрэнэр хас биирдии оҕо саха тылын билэр. Манна тылы үөрэтии методикатыгар боппуруос баар. Ол иһин төрөөбүт тылы билбэт оҕо ахсаана эбилиннэҕин ахсын, биһиэхэ элбэх эппиэтинэс сүктэриллэр», — диэтэ үөрэх миниистирин бастакы солбуйааччыта Алевтина Аргунова.

Рекомендациялары Ил Түмэн мунньаҕын бэрэссэдээтэлин бастакы солбуйааччыта Александр Жирков оҥордо. Уопсастыбаннас уонна норуот депутаттара эмиэ этиилэри киллэрдилэр. Этиилэр ортолоругар төрүт тылы үөрэтии чааһын элбэтии, сахалыы тыллаах мультфильмнары оҥоруу, учебниктары дэлэтии киирдилэр. Саамай кылаабынайа — дьиэ кэргэнтэн, дьыссааттан саҕалаан, оҕону төрүт тылга систиэмэлээхтик үөрэтии.

Депутаттар маны сэргэ күннээҕи туттуллар тыллары тылбаастаан туттар, холобур, нэдиэлэ күннэрин, ордук буоларын эттилэр. Төрүт тыл сайдыытыгар үөрэх былаанын саҥардыыны учууталлар иккис съезтэригэр дьүүллэһиэхтэрэ. Киэҥ ыҥырыылаах мунньах сэтинньи 24 — 25 күннэригэр буолуоҕа.

Саха сиригэр төрүт тылы сайыннарыыга уонна харыстааһыҥҥа 2022 сылга 56 мөл солк тыырыллыбыта.

Следите за самым важным и интересным в Telegram-канале и WhatsApp-группе ЯСИА