Москубаҕа «Кочевье Севера-2024» хотугу норуоттар култуураларын Бүтүн Россиятааҕы бэстибээлэ буолан ааста. Саха сириттэн Эбээн-Бытантай улууһуттан «Мэрлэнкэ» норуот ансаамбыла кыттыыны ылла.
«Мэрлэнкэ» диэн эбээн тылыттан тылбаастаатахха, «ньургуһун» диэн буолар. Ансаамбыл быйыл тэриллибитэ 20 сылын бэлиэтиир. Бу бэлиэ даатаҕа оруобуна сөп түбэспит курдук, кини норуодунай ааты сүгэр чиэскэ тигистэ. Салайааччынан Анжела Горохова буолар.
Ол курдук 11 киһиттэн турар дэлэгээссийэ дойдубут тэбэр сүрэҕэр — Москубаҕа көтөн тиийэн улахан сыанаҕа икки хайысхаҕа бэйэлэрин көрдөрдүлэр. Ырыа өттүгэр икки нүөмэри толордулар. Төрүт музыкальнай инструменнар тыыннаах доҕуһуолларынан нүөмэрдэри көрөөччүлэргэ тиксэрдилэр. Көрүү түмүгүнэн кинилэр бастакы миэстэни ылары ситистилэр.
Маны таһынан ансаамбыл «Театральное представление» салааҕа «Дэлбүргэ» диэн ыраастаныы сиэрин-туомун көрдөрдө. Бу нүөмэр эбээн култууратын кэрэһитэ, дьиҥнээх түҥ былыргыттан илдьэ кэлбит уонна ыччакка тарҕаппыт Федора Константиновна Горохова тыыннааҕар устан хаалбыт норуот матыыптарын доҕуһуолугар толорулунна. Бу салааҕа кинилэр анал бирииһинэн бэлиэтэннилэр.
Бу манан артыыстар көлүөнэ ситимэ быстыбатын, сарсыҥҥыга эрэллээхтэрин, төрүт култуура кэхтибэтин толору туоһулаатылар, көрөөччүлэр биһирэбиллэрин ыллылар.
«Мэрлэнкэлэр» бу айаннарын Саха сириттэн тэрийэн, сирдээн ыыппыт «Северный колорит» айар бөлөх салайааччытыгар, СӨ Култууратын туйгунугар Варвара Обоюковаҕа, Москубаҕа ыйан-кэрдэн илдьэ сылдьыбыт Карл Капитоновка муҥура суох махталларын тиэрдэллэр.
Маны таһынан ыраахтан тиийбит ыалдьыттар аан дойду таһымнаах «Сокровища Севера» быыстапка-дьаарбаҥкаҕа кытыннылар уонна ситиһии, уопут, үөрүү аргыстаах дьиэлэригэр төнүннүлэр.
Ааптар: Анфиса Слепцова.
