Арассыыйа ЫБММ үлэһиттэрэ Саха сирин ойууругар сэрэтэр рейдэлэри ыыталлар. Дьаһаллар баһаартан сэрэхтээх буолуу ирдэбиллэрин кэһиини тохтоторго тэриллибиттэр уонна баһаар кутталын аҕыйатарга аналлаахтар. Бу туһунан регионнааҕы биэдэмистибэ пресс-сулууспата иһитиннэрэр.
Инспектордар дьон уоту уматалларын кэтээн көрөллөр, биллэр сынньанар сирдэргэ бобор бэлиэлэр баалларын бэрэбиэркэлииллэр, бөҕү-сыыһы, кураанах оту-маһы сокуоннайа суох уматыы чахчыларын арыйаллар. Нэһилиэнньэлээх пууннар аттыларыгар, туристическай маршруттарга уонна маассабай сынньалаҥ зоналарыгар ураты болҕомтону уураллар.
Рейдэлэр кэмнэригэр исписэлиистэр нэһилиэнньэни кытта кэпсэтии ыыталлар, баһаар түбэлтэтигэр инструкциялары түҥэтэллэр, үлэлиир хааччахтары, ыстарааптары кэпсииллэр, ону тэҥэ буруйдаах дьону эппиэккэ тардаары кэһиилэри бэлиэтииллэр.
Арассыыйа ЫБММ Саха сиринээҕи административнай практика уонна доппуруостааһын отделын начаалынньыга Надежда Петрова халлаан сылыйыаҕыттан айылҕаҕа тахсыы, пикник уонна походтар ахсааннара эбиллэрин бэлиэтиир. Гражданнар бары быраабылаҕа эппиэтинэстээхтик сыһыаннаспаттар: уоту хааллараллар, быраҕыллыбыт табах эбэтэр оннооҕор күн сардаҥатын фокустуур өстүөкүлэ бытархайдара улахан уоту үөскэтиэхтэрин сөп.
«Биһиги рейдэлэрбит хонтуруоллуур эрэ буолбакка, сэрэтэр майгылаахтар: дьоҥҥо боростуойдук иһитиннэрэбит — баһаары умуруорардааҕар уоту сэрэхтээхтик туттубут быдан ордук. Хас биирдии киһи ойууру харыстааһыҥҥа уонна тулалыыр дьон куттала суох буолуутугар эппиэтинэһин өйдүөхтээх», — диэн тоһоҕолоон бэлиэтээтэ.
Ыам ыйынааҕы бырааһынньыктар иннилэригэр Арассыыйа ЫБММ Саха сирин олохтоохторугар уонна ыалдьыттарыгар сэрэтэр: анамматах сирдэргэ, ордук кураанах, тыаллаах-куустаах сиргэ уоту уматыы букатын бобуллар; айылҕаҕа уоту кичэйэн умуруоруохха, умайар испиискэлэри, табаҕы быраҕымыахха, кураанах от, мас чугаһыгар аһаҕас уоту туһанымыахха; ойуур аттыгар бөҕү-сыыһы, кураанах үүнээйини уматыы бобуллар; баһаар буола турарын көрдөххө тута 112 эбэтэр 101 эрийиэххэ наада.
