13 От ыйа 13.07
  • 29°
  • $ 87,74
  • 95,76

Саха сирин губернатора Иван Крафт төрөөбүтэ 160 сыла Новгород уобалаһыгар бэлиэтэннэ

12:02, 20 апреля 2021
Текст:
Читайте нас на
Яндекс Новости
ЯДВ

Уһулуччулаах судаарыстыбаннай деятель, Саха сирин губернатора Иван Иванович Крафт төрөөбүтэ 160 сыла. Саха сирин дэлэгээссийэтэ Новгородскай уобалас Никандрово сэлиэнньэтигэр тиийэ сырытта. Крафт манна харалла сытар.


Иван Крафт уҥуоҕа Свято-Троицкай Никандровскай манастыыр таһыгар харалла сытар. Манна 2009 сыллаахха Дьокуускай куорат дьаһалтатын үбүлээһининэн мэҥэ бэлиэ туруоруллубута.

Саха сирин дэлэгээссийэтин митрополит Новгородскай уонна Саторусскай Лев көрсөн анал сулууспа ыытта. “Бүгүн биһигини Иван Крафт туһунан өйдөбүл муста. Кырдьык, кини улуу киһи этэ. Кини олоҕун бүтүннүү Россия судаарыстыбата сайдарыгар анаабыта. Ол холобур буолар. Ону тэҥинэн саха норуота, Саха сирин салалтата Иван Крафт туһунан үтүө өйдөбүлү тута сылдьаргыт биһиэхэ күндү буолар“, — диэтэ.

Салгыы Любытино сэлиэнньэ Култууратын дьиэтигэр РФ Президенин иһинэн Саха Өрөспүүбүлүкэтин бастайааннай бэрэстэбиитэлистибэтинэн уонна оройуон дьаһалтатынан өйдөбүнньүк киэһэ тэрилиннэ. Манна олохтоохторго хаартыска быыстапката туруорулунна. Өлүөхүмэ улууһуттан “История земледелия Якутии” музейын дириэктэрэ Ирина Никифорова бу тэрээһиннэргэ диэн анаан-минээн кэлэн, Ерофей Ересько Иван Крафт Өлүөхүмэтээҕи сырыыларын саҕана хаартыскаҕа түһэрэн үйэтиппит каадырдарын көрдөрөн кэпсээтэ. Кырдьык да, XX-с үйэ саҕаланыыларыгар сайдыы бастакы олуктарын бэлиэтэ — хаартыскаҕа түһэрии түмүгэ аныгы кэмҥэ история кэрэһитэ буолан тиийбитэ сөхтөрдө.

Саха национальнай библиотекатын кытта быһа эфир олохтонон, сүрүннүүр исписэлиис Валентина Неустроева Иван Крафтка туһуламмыт онлайн-быыстапканы билиһиннэрдэ.

Сахалар ааттарыттан историк, кыраайы үөрэтээччи Николай Габышев Иван Иванович олоҕун, Саха сиригэр үтүөтүн-өҥөтүн, ону тэҥэ сүдү киһи тиһэх күннэрэ ханна, хайдах ааспыттарын туһунан архыыптартан көрдөөн булбут хас да сыллаах үлэтин кэпсээтэ. Ол түмүгэр Саха сирин губернатора ханна көмүллэ сытара чопчуланан, билигин биһиги кини уҥуоҕар тиийэн сүгүрүйэр кыахтаахпыт.

Тэрээһини Саха сирин устудьуоннарын ансаамбылларын эҕэрдэ нүөмэрдэрэ ситэрэн биэрдилэр. Олохтоохтор ааттарыттан Любытинскай оройуон баһылыга Андрей Устинов Саха сирин салалтатыгар бу курдук норуоттары ситимниир уонна историяны үйэтитэр үлэлэрин иһин махталын биллэрдэ, диэн суруйда СИА-ҕа Анфиса Слепцова, Россия суруналыыстарын сойууһун чилиэнэ, Санкт-Петербург куораттан.

Следите за самым важным и интересным в Telegram-канале и WhatsApp-группе ЯСИА