Россия ийэлэрин күнүн көрсө өрөспүүбүлүкэ баһылыга Айсен Николаев элбэх оҕолоох ийэлэргэ судаарыстыбаннай наҕараадалары туттарда. Региоҥҥа бүгүн 33 тыһ тахса элбэх оҕолоох ийэ олорор. «Высшая благодарность матери» бэлиэни 18 оҕолоох Дьааҥы улууһугар олорор ийэ ылла, суруйар СИА.
«Ийэ буолуу – улуу чиэс, улахан үлэ, ол иһин судаарыстыба таһымыгар өйөбүл хайаан да наада. Ийэ доруобуйатын харыстааһын инники тутуллар сорук, быйыл хат уонна ийэ үүтүнэн оҕолорун аһатар ийэлэри өйүүр тэрээһиннэр олохтоннулар. Биһиги ийэлэрбитигэр истиҥ сыһыаннарыгар уонна харыстыыр-хараһыйар майгыларыгар махтанабыт», – диэн эҕэрдэлээтэ Айсен Николаев.
Кини бэлиэтээбитинэн, 2022 сыл уон ыйыгар региоҥҥа 9 558 оҕо төрөөтө.
«Мать-героиня» бэлиэни Сунтаартан Афанасия Конобулова тутта. Кини 10 оҕолоох, өссө биир оҕону күүтэллэр. «Высшая благодарность матери» бэлиэнэн Дьааҥыттан Людмила Слепцованы эҕэрдэлээтилэр, кини 18 оҕолоох. «Төрөппүтүм алтыалар, 12 иитэрим. Уон оҕом оскуолаҕа үөрэнэр, улахаттар үлэһиттэр, биир армияҕа сулууспалыыр, үс сиэннээхпин. Үрдүк наҕараадаҕа махтанабын, ийэ буолуу — улахан үлэ», – диэтэ Людмила Слепцова.
Саха сиригэр Ийэ сылынан медицина тэрилтэлэригээр аһаҕас ааннар тэриллэллэр, ийэ буолууга уонна оҕо сааска социальнай уонна үөрэх дьаһаллара ыытыллаллар. Дьокуускайга биэс уонна онтон элбэх оҕолоох ыаллары баай-дуол нолуогуттан босхолоотулар. 2022 сылга төрөөбүт оҕолор 100 тыһ солк төлөбүр ылаллар, өрөспүүбүлүкэ баһылыгын ыйааҕар олоҕуран.
Хаартыска: Андрей Сорокин, СИА
