Бүгүн, сэтинньи 23 күнүгэр, Дьокуускайга Россия ийэлэрин күнүгэр анаммыт судаарыстыбаннай наҕараадалары туттарыахтара. Өрөспүүбүлүкэ улуустарыттан кэлбит элбэх оҕолоох ийэлэр «Белая роза – Саха» медицина киинигэр доруобуйаларын туругун көрдөрдүлэр. Ол туһунан регион сүрүн пресс-сулууспата суруйда.
Быраас-маммолог Надежда Васильева эппитинэн, киин 2016 сылтан элбэх оҕолоох ийэлэри ыҥыран, доруобуйаларын туругун көрөр. Маммография, УЗИ арааһа, консультациялар, кольпоскопия, онкоцитологияҕа анаалыстар ылаллар. Сэтинньи 22 күнүгэр улуустартан уонна киин куораттан аҕыс элбэх оҕолоох ийэ медицина көрүүтүн аста. Бу дьаһал Россия ийэлэрин күнүн көрсө ыытылынна.
Ийэлэр бүгүн «Ийэҕэ үрдүкү махтал», «Дьоруой Ийэ» уонна «Ийэ килбиэнэ II, III степеннэр» судаарыстыбаннай бэлиэлэри тутуохтара.
