Саха сирин Эдэр тутааччыларын ассоциациятын отчуоттуур-быыбардыыр конференциятыгар саҥа бэрэсидьиэнинэн “Горизонт” ХЭТ генеральнай дириэктэрин солбуйааччы Василий Данилов талылынна.
“Мин тутуу эйгэтигэр уонна салайар үлэҕэ уопуттаахпын. Өрөспүүбүлүкэбит сайдарын туһугар киэҥ хабааннаахтык үлэлиэхпит, туруоруллубут сыалы-соругу ситиһиэхпит”, — диэтэ Василий Данилов.
Оттон ассоциация вице-бэрэсидьиэнинэн Егор Слободчиков буолла.
Тэрилтэ урукку салайааччыта Иннокентий Сивцев эдэрдэргэ баҕа санаатын тиэртэ. “Биһиги ассоциациябыт Саха сиригэр эдэр тутааччылары түмэр сыаллаах тэриллибитэ. Тутааччы сүрүн үлэтин сэргэ, уопсастыбаннай үлэҕэ эмиэ кыттыыны ылыахтаах”, — диэн кини санаатын эттэ.
