Бэс ыйын 27 күнүгэр, Туймаада ыһыаҕын кэмигэр, Дьокуускайга «Үс Хатыҥ» ипподромугар Саха сирин баһылыгын бирииһигэр ыраас хааннаах боруода аттарга сүүрдүүлэр буолуохтара. Сүүрдүүлэр киэһэ 19:00 саҕаланаллар. Жокейдар уонна кинилэр аттара 1000, 1600, 2400 уонна 3000 миэтэрэлэргэ илин-кэлин түсүһүөхтэрэ. Хас биирдии дистанция түмүгүнэн үс кыайыылаахха харчынан бириистэр туттарыллыахтара. Быйылгы сүүрдүүлэр уопсай бириистээх пуондалара 6,1 мөлүйүөн солкуобайга тэҥнэстэ.
Бүгүн «Сахамедиа» медиа-киинигэр сүүрдүү кыттыылаахтарыгар сэрэбиэй бырахсыыта буолан, сүүрдүүлэр старттарын бэрээдэгэ быһаарылынна.
Саха Өрөспүүбүлүкэтин Ат спордун федерациятын бэрэсидьиэнэ Эдуард Рехлясов пресс-кэмпириэнсийэҕэ иһитиннэрбитинэн, өрөспүүбүлүкэ баһылыгын бирииһигэр ат сүүрдүүтэ быйыл 22-с төгүлүн ыытыллар. Бу күрэхтэһиилэр ат сүүрдүүтүн сезонугар саамай киэҥ хабааннаах уонна көрөөччүлэргэ умнуллубат түгэннэри бэлэхтииллэр. Үгэс курдук бастыҥ сүүрүктэр кытталлар уонна трибуналар толору дьон мустар.
«Сүүрдүүлэри АГИП уонна өрөспүүбүлүкэ бырабыыталыстыбата, Тыа хаһаайыстыбатын министиэристибэтэ, Дьокуускай куорат дьаһалтата, ону тэҥэ Саха сирин Ат спордун федерацията тэрийэллэр. Сүүрдүүлэргэ бэс ыйын 12 күнүгэр буолбут сүүмэрдиир сүүрдүүлэри ааспыт ыраас хааннаах боруода атыырдар, мериннар уонна биэлэр кыттар бырааптаахтар. Уопсайа сүүрдүүлэргэ Томпотооҕу, Үөһээ Бүлүүтээҕи, Хаҥаластааҕы, Мэҥэ Хаҥаластааҕы, Намнааҕы уонна Чурапчытааҕы оройуоннардааҕы ат спордун федерацияларын 10 чилиэнэ кыттар», – диэн Эдуард Рехлясов кэпсээтэ.
Онон, өрөспүүбүлүкэ Бырабыыталыстыбатын вице-премьерэ Сергей Местников бигэргэппит балаһыанньатыгар сөп түбэһиннэрэн, 1000 миэтэрэ дистанцияҕа бириистээх пуонда 300 тыһыынча солкуобайга тэҥнэһэр: бастакы миэстэҕэ – 150 тыһыынча солкуобай, иккискэ – 100 тыһыынча солкуобай уонна үһүскэ – 50 тыһыынча солкуобай (бириис спонсордара – Дьокуускай куорат дьаһалтата уонна Саха сирин Ат спордун федерацията).
Ити курдук харчынан бириистэр 1600 миэтэрэ дистанцияҕа эмиэ көрүллэллэр, манна бириис спонсорынан «Алмазэргиэнбанк» буолар.
3200 миэтэрэ дистанцияҕа Саха сирин Ат спордун федерациятын тэрийэр спонсордартан бириистээх пуондата мөлүйүөн аҥара солкуобайга тэҥнэһэр. Бу түгэҥҥэ кыайыылаахха 250 тыһыынча солкуобай, үрүҥ көмүс призерга – 150 тыһыынча солкуобай, боруонса призерга – 100 тыһыынча солкуобай туттарыллар.
Түмүккэ, 2400 миэтэрэ дистанцияҕа сүрүн бириис – Саха сирин баһылыгын бирииһэ – 5 мөлүйүөн солкуобай оонньонор. Бириис спонсора – өрөспүүбүлүкэ Тыатын хаһаайыстыбатын министиэристибэтэ. Онон кыайыылаах 2,5 мөлүйүөн солкуобайы, үрүҥ көмүс призер – 1,25 мөлүйүөн солкуобайы, 3-с миэстэни ылбыт – 750 тыһыынча солкуобайы, оттон 4-с миэстэҕэ – 500 тыһыынча солкуобайы ылар.
