Ааспыт сууккаҕа Дьааҥы, Үөһээ Бүлүү, Нерюнгри уонна Мэҥэ Хаҥалас улуустарыгар уопсайа 46 гектар иэннээх сири хаппыт 4 ойуур баһаара умуруорулунна. Бу туһунан брифинг кэмигэр экология, айылҕаны туһаныы уонна ойуур хаһаайыстыбатын министиэристибэтин ойууру харыстааһын, көмүскээһин уонна сайыннарыы департаменын салайааччыта Николай Никитин иһитиннэрдэ.
Суукка саҕаланыытыгар Нерюнгри, Өлүөхүмэ, Мииринэй, Ленскэй, Орто Халыма уонна Таатта улуустарыгар уопсайа 6142 гектар иэннээх сиргэ 11 ойуур баһаара баар. Кинилэри умуруорууга 316 киһи уонна 13 тиэхиньикэ үлэлиир.
23 лесничество территориятыгар авиационнай мониторинг ыытыллар. Ону тэҥэ, өрөспүүбүлүкэ бүтүн территориятыгар сиринэн мониторинг оҥоһуллар. Харабылланар зонаҕа ойуур баһаардарын умуруоруу суһала — 98%.
14 муниципальнай оройуон уонна Дьокуускай куорат территорияларыгар ураты баһаарынай эрэсиим киллэриллибитэ.
Нерюнгри уонна Ленскэй оройуоннарыгар ойуурга муниципальнай таһымнаах ыксаллаах быһыы-майгы эрэсиимэ оннунан хаалар.
Баһаартан сэрэхтээх буолуу сезона саҕаланыаҕыттан Саха сиригэр ойуур пуондатыгар уопсайа 18 942,8 гектардаах сири хаппыт 167 ойуур баһаара бэлиэтэммит.
Ааспыт сыл бу кэмин кытта тэҥнээтэххэ, уопсайа 53 984,55 гектардаах сири хаппыт 153 ойуур баһаара регистрацияламмыт, ол көрдөрүүтэ быйылгы сыллааҕар уот сиэбит иэнинэн биллэ үрдүк.
