Саха сиригэр «Земский тренер» бырагыраама кыттыылаахтарын куонкурустаан талыы салҕанар. 2026 сылга өрөспүүбүлүкэҕэ кыра нэһилиэнньэлээх пууннарга үлэлии киирээччи тириэньэрдэргэ биирдэ бэриллэр төлөбүргэ 18 квота көрүллүбүт.
Уһук Илин федеральнай уокурук субъектарыгар федеральнай уонна эрэгийиэн бүддьүөттэриттэн хос үбүлээһин усулуобуйатынан 2 мөлүйүөн солкуобайдаах төлөбүр оҥоһуллар.
Саха сирин физическэй култуураҕа уонна успуорка министиэристибэтэ бу бырагыраамаҕа кыттарга сайаапкалары 2026 сыл атырдьах ыйын 10 күнүгэр диэри тутар. Куонкурус түмүгүнэн, атырдьах ыйыгар кыайыылаахтар биллиэхтэрэ, оттон балаҕан ыйын 1 күнүттэн исписэлиистэр өрөспүүбүлүкэ нэһилиэнньэлээх пууннарыгар үлэлэрин саҕалыахтара.
2025 сылга үс исписэлиис сөбүлэҥ түһэрсибитэ. Байыаннай дьайыы бэтэрээнэ, көҥүл тустууга тириэньэр Петр Парников Мэҥэ Хаҥалас улууһун Петровка сэлиэнньэтигэр, көҥүл тустууга тириэньэр Петр Суздалов — Хаҥалас улууһугар, оттон дуобат тириэньэрэ Мария Охлопкова — Жатайга үлэлииллэр.
«Дойду бэрэсидьиэнэ Владимир Путин көҕүлээһининэн олус наадалаах „Земский тренер“ бырагыраама саҕаланна. Мин аармыйа кэнниттэн бу эйгэҕэ үлэ көрдөөбүтүм, тоҕо диэтэр, тириэньэринэн үлэлээн баран, бу мин анал идэм, ордук оҕолору кытта алтыһыы миэхэ чугаһын өйдөөбүтүм. Бырагыраама туһунан истэн, докумуоннарбын куонкуруска биэрбитим. Араас вакансиялартан Мэҥэ Хаҥалас улууһун талбытым. Билигин Петровка сэлиэнньэтин ДЮСШ-гар үлэлиибин. Бу улууска бөҕөстөрү бэлэмниир күүстээх бааза уонна үчүгэй үгэстэр бааллар», — диэн бойобуой дьайыылар бэтэрээнэ Петр Парников бэлиэтээтэ.
Бырагыраама Арассыыйа бэрэсидьиэнэ Владимир Путин сорудаҕынан, «Спорт России» федеральнай бырагыраама, Саха сирин баһылыгын Стратегическай ыйааҕын иһинэн, ону тэҥэ «Биир ньыгыл Арассыыйа» баартыйа норуодунай бырагырааматын уонна «Чэгиэн инники олох» баартыйа бырайыагын чэрчитинэн олоххо киирэр. Баар вакансиялар испииһэктэрин уонна докумуоннар барылларын Саха сирин Успуорт министиэристибэтин официальнай саайтыгар билсиэххэ сөп.
