Саха сиригэр 2022 сылга «земскэй доктор» уонна «земскэй фельдшер» бырагырааманан 140-тан тахса киһини үлэҕэ тардар былааннаахтар. Бу туһунан СӨ Доруобуйа харыстабылын министиэристибэтин пресс-сулууспата иһитиннэрдэ.
«Земскэй доктор» уонна «земскэй фельдшер» бырагырааманан Саха сиригэр 2022 сылга барыта 147 исписэлииһи үлэнэн хааччыйыы былааннаммыт, ол иһигэр 120 быраас уонна 27 фельдшер», — диэн министиэристибэҕэ кэпсээтилэр.
2021 сылга бу бырагырааманан барыта 117 медигы кытары дуогабар түһэрсиллибитэ. Олортон 28 быраас уонна 10 фельдшер Арктика нэһилиэнньэлээх пууннарыгар үлэлии барбыттара.
2020 сылтан Саха сиригэр медиктэр хамнастара икки төгүл улаатта. Куорат тииптээх сэлиэнньэлэргэ уонна оробуочай бөһүөлэктэргэ үлэлии кэлбит быраастарга 2 мөл. солк., фельдшердарга 1 мөл. солк. биэрэллэр. 50 тыһ.киһилээх нэһилиэнньэҕэ эбэтэр куоракка тиийбит быраастарга 1 мөл. солк., фельдшердэргэ 500 тыһ. солк. көрүллэр.
2022 сылга биир кэмнээх төлөбүрдэргэ 247 мөл. солк. тахса үп көрүлүннэ.
