Саха сиригэр ааспыт суукка иһигэр 18 ойуур баһаарын, уопсай иэнэ 4533 гектары, умуруордулар. Ол туһунан экология, айылҕа харыстабылын уонна ойуур хаһаайыстыбатын миниистирин солбуйааччы, өрөспүүбүлүкэ кылаабынай лесничайа Андрей Коноплев иһитиннэрдэ.
От ыйын 10 күнүгэр сарсыарда 47 ойуур баһаара баар, уопсай иэнэ 38 620 гектар. Уопсайа 11 929 гектар иэннээх 16 ойуур баһаарын умуруорар үлэ салҕанар. Умуруорууга 598 киһи уонна 23 техника тардылынна.
Ыраах, айана ыарахан сиргэ, хонтуруоллуур зонаҕа, 31 ойуур баһаара баар, уопсай иэнэ 26 692 гектар. Кинилэри умуруоруу, КЧС быһаарыытынан, тохтотулунна.
Бүгүн 19 лесничество сиригэр 17 салгын суднота авиамониторинг ыытар. Сэттэ Ми-8 салгын суднота үлэлии турар ойуур баһаарын умуруорууга кыттар. Харыстанар зонаҕа ойуур баһаарын умуруоруу түргэнэ 98% тэҥнэһэр.
«Ураты баһаартан сэрэтэр эрэһиим 15 муниципальнай тэриллии уонна Дьокуускай сирдэригэр салҕанар. От ыйын 5 күнүттэн Эдьигээн оройуонун сиригэр- уотугар, от ыйын 8 күнүттэн Таатта оройуонун сиригэр-уотугар муниципальнай характердаах ыксаллаах быһыы-майгы эрэһиимэ киллэрилиннэ. Итинэн сибээстээн, бүгүҥҥүттэн өрөспүүбүлүкэ сиригэр-уотугар ыксаллаах быһыы-майгы эрэһиимэ киллэриллэр. Билигин нуорма-быраап аакталара илии баттааһыҥҥа сылдьар», — диэтэ Коноплев.
Баһаартан кутталлаах сезон саҕаланыаҕыттан Саха сиригэр 275 ойуур баһаара уопсайа 67 129 гектар иэннээх, бэлиэтэннэ. Ааспыт сыл туһааннаах кэмигэр 157 ойуур баһаара бэлиэтэммитэ, сиэниллибит иэнэ 53 988,45 гектар буолбута.
