Саха сиригэр оҥоһуу тиийбэт буолууну сэрэтэр сыалтан, «Саханефтегазсбыт» АУо судаарыстыбаннай тэрилтэ уматыгы атыыга лимиттэри киллэрдэ. Бу туһунан Саха сирин гражданскай оборуонатын уонна нэһилиэнньэ олоҕор-дьаһаҕар куттал суох буолуутун хааччыйар министиэристибэ иһитиннэрдэ.
Биэдэмистибэ бэлиэтээбитинэн, маннык миэрэлэр “омуннаах атыылаһыыны” сэрэтэр уонна ис ырыынагы ниэп бородуукталарынан бигэ туруктаахтык хааччыйар сыалтан ылыллаллар.
Маныаха майгынныыр быстах кэмнээх хааччахтааһыннар Россия атын регионнарыгар эмиэ киирбиттэрэ, ол иһигэр Забайкальскай кыраайга, Дагестан Өрөспүүбүлүкэтигэр, Ульяновскай, Курган уонна да уобаластарга.
«Бу күннэргэ хас да муниципалитекка уматык улахан иэнинэн атыылаһыллыбыта бэлиэтэннэ. Үспүкүлээннээһини уонна оҥоһуу тиийбэт буолууну үөскэппэт туһуттан, биһиги атыыга лимииттэри киллэрэбит», – диэн Саха сирин гражданскай оборуонатын уонна нэһилиэнньэ олоҕор-дьаһаҕар куттал суох буолуутун хааччыйар миниистир Дмитрий Лепчиков быһаарда.
Лимииттэр сапараапкалыыр ыстаансыйалар бары ситимнэригэр киллэриллибэт, саамай улахан омун бэлиэтэммит Нерюнгри, Алдан, Мэҥэ Хаҥалас, Нам, Хаҥалас, Ленскэй, Уус-Майа оройуоннарыгар уонна Дьокуускай куоракка дьайаллар.
Биир тырааныспарка бэнсиин 30 л, дизель уматыга 200 л буолар. Ону тэҥэ, ханнык баҕарар туттар таараларга уматык биэрии быстах кэмҥэ бобуллар.
«Лимииттэр – биллэн турар, кыһалҕалаах кэмҥэ ылыллыбыт кытаанах миэрэлэр. Ол гынан баран, бу быстах кэмнээх, ырыынакка балаһыанньа бигэтийиэр диэри. Буола турар балаһыанньаны өйдүүргүтүгэр көрдөһөбүт», – диэн Дмитрий Лепчиков Саха сирин олохтоохторугар туһаайан эттэ.
Ис ырыынагы уматыгынан хааччыйыы боппуруоһа дойду президенин уонна Российскай Федерация бырабыыталыстыбатын хонтуруолугар сылдьар. Бэс ыйын 28 күнүгэр буолбут мунньахха президеммит Владимир Путин ылыммыт миэрэлэр быстах кэмнээхтэрин бэлиэтээтэ. Кини этэринэн, от ыйыгар сүрүн уматык көрүҥүн оҥорон таһаарыы улаатыахтаах, ылыммыт быһаарыыларбыт балаһыанньаны бигэтитиигэ, уопсай көрдөбүлү улаатыннарыыга уонна экэнэмиичэскэй өттүнэн төрүттэммит сыаналары тутууга туһаайыллаллар.
Санатан эттэххэ, урут чааһынай тэрилтэлэр бэнсиин сыанатын 3,1% — 3,7% диэри үрдэтэн атыылаабыттара. Онуоха «Саханефтегазсбыт» АУо уматык сыанатын үрдэппэтэҕин бэлиэтиибит.
