Быйыл Саха сиригэр тыа сирин балыыһаларыгар уонна фельдшерскэй-акушерскай пууннарыгар 100 испэсэлииһи үлэҕэ киллэрэр сорук турар, онтон 79-һа быраас уонна 21-рэ фельдшер. Билигин дуогабары 33 медик түһэристэ, ол туһунан Саха сирин доруобуйа харыстабылын министиэристибэтиттэн иһитиннэрдилэр.
«Земскэй доктор» уонна «Земскэй фельдшер» бырагыраамаларынан куорат тииптээх сэлиэнньэлэргэ эбэтэр бөһүөлэктэргэ барар быраастарга 2 мөл.солк., фельдшердэргэ 1 мөл. солк. төлөбүр көрүллэр. Итини сэргэ 50 тыһыынчаҕа диэри нэһилиэнньэлээх куораттарга үлэлии барар быраастарга 1 мөл.солк., оттон фельдшердэргэ 500 тыһ солк көрүллэр. Бу үбү медиктэр дьиэ-уот, тырааныспар атыылаһыыга эбэтэр көһөн тиийбит сирдэригэр тэрээһини кытта сибээстээх атын наадыйыыларга туттуохтарын сөп.
«Бырагыраамалар үлэлиир сылларыгар тыа медицинатыгар 1,6 тыһыынчаттан тахса медицинскэй исписэлииһи үлэлэттибит, хас биирдиилэрэ – судаарыстыбаннай өйөбүл өрөспүүбүлүкэ саамай ыраах муннуктарыгар көмө тиийимтиэтин уларытарын холобура. 2025 сыллааҕы былааны сүүс бырыһыан толоруу уонна 2026 сыллааҕы дуогабардары көхтөөхтүк түһэрсии бырагыраамалар ирдэнэллэрин көрдөрөр», — диэн Саха сирин доруобуйа харыстабылын миниистирэ Лена Афанасьева бэлиэтээтэ.
«Уһун уонна көхтөөх олох» национальнай бырайыак индикатордарын ситиһэргэ министиэристибэ каадырга салаата бу хайысхаҕа үлэни салгыы ыытар.
