Саха сиригэр аграрийдары наадалаах уматык кээмэйинэн хааччыйар туһуттан биир кэлим реестр оҥоһуллар. Бу туһунан регионнааҕы Тыа хаһаайыстыбатын уонна ас-үөл бэлиитикэтин миниистирэ Артем Александров иһитиннэрдэ.
«От үлэтин уонна күһүҥҥү хомуур кэмигэр аграрийдар уматыгынан хааччыллыахтара. Биһиги билигин сэлээркэҕэ уонна бэнсииҥҥэ наадыйыы реестрин оҥоробут. Уопсай наадыйыы 10 тыһыынча туонна сэлээркэ уонна 5 тыһыынча туонна бэнсииҥҥэ тэҥнэһэр. Бу үлэ нэһилиэнньэ олоҕун-дьаһаҕын куттала суох буолуутун хааччыйыыга уонна гражданскай оборуона дьыалаларыгар министиэристибэнэн сүрүннэнэр», — диэтэ тыа хаһаайыстыбатын миниистирэ.
Эрдэ иһитиннэриллибитин курдук, Саха сиригэр уматык саппааһа сөптөөх кээмэйинэн оҥоһуллубута – сапыраапкаларга “ажиотажнай” наадыйыыттан сылтаан, сэрэтэр миэрэлэр ылыллыбыттара. Бэнсиин уонна сэлээркэ тиэйиитэ салҕанар, саппаас толоруллар.
Бэс ыйын 24 күнүгэр Арассыыйа Федерациятын Бырабыыталыстыбатын Бэрэссэдээтэлин солбуйааччыта Александр Новак салалтатынан федеральнай штабка өрөспүүбүлүкэҕэ ньиэп бородуукталарын тиэйиигэ наадыйар кээмэй — 239 тыһыынча туонна — бигэргэтиллибитэ. «Саханефтегазсбыт» «Газпромнефть» кытта быһаччы дуогабарынан үлэтин салгыыр, ырыынак атын кыттааччыларыгар эбии тиэйиилэр биллэриллибиттэрэ.
