Саха сиригэр ааспыт нэдиэлэҕэ ыытыллыбыт өрөспүүбүлүкэ тыа хаһаайыстыбаларын кээпэрэтииптэрин съездтэригэр саҥа өйөбүл миэрэлэри кэпсэттилэр. Регион бырабыыталыстыбатын бу хайысхаҕа сүрүннүүр сэбиэтин мунньаҕар ол туһунан эттилэр.
Бырабыыталыстыба бэрэссэдээтэлин солбуйааччыта Сергей Местников бэлиэтээбитинэн, өйөбүл систиэмэтин уларыта тутуу кэмэ кэллэ. «Ил Дархан оҥорон таһаарыыны сайыннарыы туһунан стратегическай ыйаахха илии баттаата. Манна тыа хаһаайыстыбатыгар оҥорон таһаарыыны сайыннарыыга чуолкай сорудахтары биэрдэ. Эт, үүт бородууксуйаларыгар индикатордар оҥоһулуннулар. Биһиги бу ыйаах олоххо киириитин толоруохтаахпыт», — диэтэ Местников.
«Сөптөөх судаарыстыбаннай өйөбүл көрүллэрин үрдүнэн көрдөрүү улааппат. Сорох хайысхаларынан намтааһын баар. Онон баар миэрэлэр таһаарыыларын сыаналаан, хайысханы өйөөһүҥҥэ саҥа миэрэлэри оҥоруохтаахпыт», — диэтэ кини.
