Саха сиригэр «Сыл дьиэ кэргэнэ — 2026» өрөспүүбүлүкэтээҕи күрэх түмүгүн таһаардылар. Аҕыс номинациянан кыайыылаахтар быһаарылыннылар. Кинилэр бары Ил Дархан Айсен Николаев аатыттан 300 тыһыынча солкуобайдаах бириэмийэни тутуохтара. Наҕараадалааһын сиэрэ-туома Дьиэ кэргэн, таптал уонна бэриниилээх буолуу күнүгэр, от ыйын 8 күнүгэр, ыытыллыа.
Саха Өрөспүүбүлүкэтин бырабыыталыстыбатын бэрэссэдээтэлин солбуйааччы Георгий Степанов иһитиннэрбитинэн, быйыл күрэххэ өрөспүүбүлүкэ араас муннуктарыттан 88 дьиэ кэргэн кытынна. «Хас биирдиилэрэ — тапталга, убаастабылга уонна дьиэ кэргэннэригэр бэриниилээх буолууга толору ситимнээх ураты эйгэлээхтэр. <…> Кыайыылаахтары ис сүрэхпиттэн эҕэрдэлиибин уонна барыларыгар махтанабын! Эһиги биһиги өрөспүүбүлүкэбит киэн туттуута, эрэллээх тирэҕэ уонна өйөбүлэ буолаҕыт», — диэн вице-премьер бэлиэтээн эттэ.
Күрэх кыайыылаахтара:
«Көмүс дьиэ кэргэн» — Степан уонна Варвара Тихоновтар (Ньурба улууһа).
«Аҕа дойду көмүскээччитин дьиэ кэргэнэ» — Василий уонна Александра Васильевтар (Горнай улууһа).
«Көс дьиэ кэргэн» — Степан уонна Наталья Захаровтар (Кэбээйи улууһа).
«Оҕону иитэ ылбыт ыал» — Егор уонна Ульяна Зыряновтар (Нам улууһа).
«Элбэх оҕолоох дьиэ кэргэн» — Максим уонна Юлиана Павловтар (Ньурба улууһа).
«Эдэр дьиэ кэргэн» — Айсен уонна Сандаара Решетниковтар (Чурапчы улууһа).
«Үгэстэри харыстааччы дьиэ кэргэн» — Рустам уонна Вера Федоровтар (Нам улууһа).
«Тыа сирин дьиэ кэргэнэ» — Иван уонна Анастасия Шеломовтар (Чурапчы улууһа).
Кыайыылаахтар Саха сирин Бүтүн Арассыыйатааҕы күрэххэ көрдөрүөхтэрэ.
Санатан эттэххэ, 2025 сыллаахха Бүтүн Арассыыйатааҕы күрэх «Эдэр дьиэ кэргэн» номинациятыгар Горнай улууһун Маҕарас сэлиэнньэтиттэн Никаноровтар дьиэ кэргэннэрэ кыайыылаах тахсыбыта.
Саха Өрөспүүбүлүкэтин Ил Дархана Айсен Николаев СӨ Бырабыыталыстыбатын үлэтин туһунан Судаарыстыбаннай Мунньах (Ил Түмэн) депутаттарыгар отчуотун кэмигэр былаас уорганнарын үлэлэрин көдьүүһүн саамай сүрүн киритиэрийинэн дьиэ кэргэн, оҕо уонна аҕам саастаах көлүөнэ олохторо-дьаһахтара тупсуута буоларын бэлиэтээн эппитэ.
