Ааспыт сууккаҕа Саха сиригэр 74 гектартан тахса иэннээх аҕыс ойуур баһаара умуруоруллубутун туһунан экология, айылҕаны туһаныы уонна ойуур хаһаайыстыбатын миниистирин солбуйааччы, регион сүрүн лесничэйэ Андрей Коноплев иһитиннэрдэ.
Уот Нерюнгри, Өлүөхүмэ, Уус Алдан, Уус Маайа уонна Эбээн Бытантай оройуоннарын территорияларыгар умуруоруллубут.
Бэс ыйын 23 күнүгэр сарсыарда Сунтаар, Нерюнгри, Мэҥэ Хаҥалас, Уус Маайа уонна Таатта оройуоннарыгар уопсайа 1,4 тыһ. гектар иэннээх тоҕус ойуур баһаара салгыы умайа турар. Уоту кытары охсуһууга 156 киһи уонна үс тиэхиньикэ тардыллыбыт.
Авиациянан кэтээн көрүүгэ 19 көтөр аал үлэлиир. Авиамониторинг 22 оройуон территориятыгар ыытыллар.
Баһаартан сэрэхтээх буолуу сезона саҕаланыаҕыттан 135 ойуур баһаара (уопсай иэнэ 9 тыһ. гектар) бэлиэтэммит. Былырыын бу кэмҥэ 148 баһаар бэлиэтэммитэ, умайбыт сир иэнэ 53 тыһ. гектары куоһарбыта. Өрөспүүбүлүкэҕэ ойуур баһаарын умуруоруу түргэнэ 95% тиийдэ.
13 муниципальнай оройуон территориятыгар ураты баһаары утары эрэһиим биллэриллибит. Ойуур баһаарын сэрэтии үлэтэ салҕанар. Ойуурга баһаартан сэрэхтээх буолуу быраабылатын 94 кэһиини буллулар, 1 мөл. 310 тыһ. солк. суумалаах ыстыраапка докумуон толорулунна, баһаар тахсыытыгар 11 буруйдааҕы быһаардылар.
Ил Дархан Айсен Николаев 2026 сыллааҕы сезоҥҥа айылҕа баһаардарын утары охсуһууну тус бэйэтинэн салайар уонна балаһыанньаны кытаанах хонтуруолга тутар.
