Саас, хаар уулуннаҕына, дьон учаастагын хаппыт оттон ыраастыыр идэлээх. Ол эрээри биири өйдүүр суолталаах: кураанах оту, ханнык баҕарар үүнээйини уматыы кытаанахтык бобуллар.
РФ бырабыыталыстыбатын 16.09.2020 № 1479 уурааҕынан бигэргэтиллибит Российскай Федерацияҕа баһаартан сэрэхтээх буолуу Быраабылатын 185 пуунугар сөп түбэһиннэрэн, тыа хаһаайыстыбатыгар анаммыт сирдэргэ, саппаас сирдэргэ, ону тэҥэ нэһилиэнньэлээх пууннарга кураанах оту, оту уонна сиэмэ тобоҕун уматар бобуулаах.
Маны таһынан РФ бырабыыталыстыбатын 07.10.2020 № 1614 уурааҕынан бигэргэтиллибит ойуурдарга баһаартан сэрэхтээх буолуу Быраабылаларын 11 пууна ойуурдарга сыстар уонна миэтэрэ аҥара тэйиччи баһаартан сэрэхтээх балаһанан араарыллыбатах учаастактарга мутугу, ойуур тэллэҕин уонна кураанах оту уматары бобор.
Кэһии туохтан кутталлааҕый
Кураанах оту уонна да атын умайар матырыйааллары уматыы иһин административнай уонна холуобунай эппиэтинэс көрүллэр.
РФ КоАП 8.32 ыстатыйатын 2 чааһыгар (ойуурга сыстар сирдэргэ быраабылалары кэһэн уматыы): гражданнарга — 30 — тан 40 тыһыынча солкуобайга диэри ыстараап; дуоһунастаах дьоҥҥо — 40-тан 60 тыһыынча солкуобайга диэри; юридическай сирэйдэргэ-300-тэн 500 тыһыынча солкуобайга диэри ыстараап.
Уот ойуур маһын суох гыммыт эбэтэр алдьаппыт буоллаҕына, РФ ХК 261 ыстатыйата күүһүгэр киирэр. Бу хайыы-үйэ холуобунай эппиэтинэс. Накаастабыл араас буолуон сөп: 200-тэн 400 тыһыынча солкуобайга диэри ыстараап (эбэтэр 1-2 сылга сууттаммыт киһи дохуотун кээмэйинэн); 480 чааска диэри булгуччулаах үлэ; 2 сылга диэри көннөрөр үлэ; 3 сылга диэри күһэйэр үлэ; 3 сылга диэри болдьоххо хаайыы.
Санатан эттэххэ, сааскы өртөөһүн сотору-сотору хонтуруолтан тахсан дьиэлэри, тутуулары, тыалары суох оҥорор улахан баһаардар төрүөттэрэ буолар. Болҕомтолоох буолуҥ уонна сокуону кэһимэҥ.
