Саха сирин бырабыыталыстыбата федеральнай былаас уорганнарын кытта өрөспүүбүлүкэни ниэп бородууктатынан хааччыйыыга уонна олору тиэрдии туруктаах буолуутун үрдэтиигэ тиһиктээх үлэни салгыыр. Бу туһунан от ыйын 13 күнүгэр гражданскай оборона дьыалаларыгар уонна регион нэһилиэнньэтин олоҕун-дьаһаҕын куттала суох буолуутун хааччыйыыга миниистир Дмитрий Лепчиков эттэ.
Кини этэринэн, бөдөҥ поставщиктары кытта быһаччы уһун болдьохтоох дуогабардары түһэрсиигэ, хааччыйыы кээмэйин улаатыннарыыга үлэ ыытыллар, ону тэҥэ өрөспүүбүлүкэ наадатыгар уматыгы атыылаһыы механизмнара чочуллаллар.
«Ыытыллыбыт үлэ түмүгүнэн региоҥҥа авиация уматыгын аҕалыы оннунан хаалла уонна уһатылынна. Итини сэргэ өрөспүүбүлүкэ тимир суол транспорыгар дизельнэй уматыгы аҕалыыга быһаччы дуогабар түһэрсэр туһунан дуогабардар ситиһилиннилэр, наадалаах докумуоннары оҥоруу салҕанар», — диэтэ Дмитрий Лепчиков.
РФ энергетикэ министиэристибэтин өйөбүлүнэн Саха сирин ниэп бородуукталарын хааччыйар тэрилтэлэригэр быһаччы уһун болдьохтоох дуогабардары түһэрсии оҥоһуллар. Тэҥҥэ хотугу тиэйии-таһыы интэриэһигэр уматыгы атыылаһарга аадырыстаах биржевай атыы-эргиэн механизма көрүллэр.
Приоритетка — аграрийдары от уонна хомуур кэмигэр уматыгынан хааччыйыы. Кинилэргэ ГСМ тиэрдии ураты бэрээдэгэ үлэлиир: бигэргэтиллибит лимииттэринэн, биирдиилээн заправкаҕа хааччаҕа суох бэриллэр. Юридическай сирэйдэр уонна кээпэрэтииптэр быһаччы дуогабардарынан уматыгы ылаллар, оттон фермердэр уонна кэтэх хаһаайыстыбалар олохтоох дьаһалталар нөҥүө сайаапкаларынан ылаллар. Ону тэҥэ хонуу үлэтигэр буочукаларга уматык кутуута тэрилиннэ
Санатан эттэххэ, Саха сирин баһылыга Айсен Николаев сорудаҕынан өрөспүүбүлүкэҕэ уматыгы хааччыйыы боппуруостарыгар оперативнай штаб тэрилиннэ, ону регион бырабыыталыстыбатын бэрэссэдээтэлин бастакы солбуйааччы Дмитрий Садовников салайар. Штаб ниэп бородууктатынан хааччыйыы балаһыанньата толору туруктаах буолуор диэри үлэлиэҕэ.
