2025 сылга Саха сиригэр ойууру чөлүгэр түһэрии үлэтэ 9 190 гектар иэннээх сиргэ ыытылынна. Былаан түөрт төгүл кэриҥэ аһары толорулунна. Бу туһунан Эколог күнүгэр анаммыт үөрүүлээх тэрээһиҥҥэ иһитиннэрдилэр.
Көдьүүс сүрүн көрдөрүүтэ — чөлүгэр түһэриллибит сирдэр сүтэриллибит сирдэргэ сыһыаннара — 100% былааннаах таһымҥа тэҥнээтэххэ, 379,1% тэҥнэстэ уонна федеральнай көрдөрүүлэри быдан куоһарда.
Сыл түмүгүнэн ойуур пуондатын сиригэр ойууру чөлүгэр түһэрии уопсай иэнэ 150 749 гектарынан быһаарылынна, былаан — 107 604 гектар. Дьаһаллар кэлимнэрэ ойуур бэйэтин чөлүгэр түһэригэр көмөлөһүүнү, эдэр мастары көрүүнү-истиини уонна атын агротехническэй ньымалары киллэрдэ.
«Саха Өрөспүүбүлүкэтин Ил Дархана Айсен Николаев бу улахан суолталаах салааны сайыннарыыга улахан болҕомтотун уурар. Бу сылларга биһиги элбэх бырайыагы бииргэ олоххо киллэрдибит, уонна бүгүҥҥү ситиһиилэрбит эһиги идэҕитигэр бэриниигитинэн ситиһилиннилэр. Ааспыт сыл бүтүүтэ министиэристибэ биир сиргэ көстө, бу биһигини биир сомоҕо кэлэктиип быһыытынан күүһүрдүөҕэ. Иннибитигэр элбэх сорук турар, уонна мин эрэллээхтик этэбин — барыта табыллыаҕа», — диэн экологтары вице-премьер Ольга Балабкина эҕэрдэлээтэ.
