Сайыҥҥы оҕо лааҕырдара быйыл кэккэ хааччахтааһыннардаах арыллыахтара. Дьаһалы муниципальнай оройуон миэстэтигэр быһаарар. Ол туһунан бырабыыталыстыба бэрэссэдээтэлин солбуйааччыта Ольга Балабкина соцситимҥэ эттэ, СИА суруйар.
Дьокуускайга уустук эпидемиологическай балаһыанньанан оҕо сайыҥҥы лааҕырдара бэс ыйыгар тэйиччиттэн буолуохтара, бу туһунан мэрия эрдэ биллэрбитэ. Куорат таһынааҕы хонуктаах лааҕырдар «сабыылаах» киэбинэн үлэлиэхтэрэ.
«Чэбдигирдэр лааҕырдары арыйыыны муниципалитет быһаарар. Сүрүн ирдэбил – үлэһиттэр вакциналаммыт буолуохтаахтар. Маннык усулуобуйаҕа оҕону ыытыыны – төрөппүт быһаарар», — диэтэ Ольга Балабкина.
Өрөспүүбүлүкэ таһыгар сынньаныы баар буолар, ол иһигэр Арктика эргимтэтин оҕолоругар. Үөрэх миниистирэ Михаил Сивцев эппитинэн, сайын устата 379 оҕону министиэристибэ хайысхатынан Краснодарскай уонна Приморскай кыраайдарга сынньатыахтаахтар.
