Эпидемиологическай балаһыанньа Саха сиригэр уустук. Күҥҥэ ортотунан 200 киһи коронавируска сутуллар. ОРВИ уонна тумуу утары быһыы биэриитэ түмүктэнэн эрэр. COVID-19 утары вакцинация саҕаланар. Бастакы дозалары «кыһыл зонаҕа» үлэлиир медиктарга анаатылар. Ол туһунан ахсынньы 14 күнүгэр суһал штаб мунньаҕар этилиннэ, суруйар СИА.
Суһал штаб мунньаҕар Ил Дархан Айсен Николаев кытынна, кини ыарыы элбээһинин таһаарбат сорук турарын иһитиннэрдэ.
«Биһиги атыы кииннэригэр, аһыыр сирдэргэ дьон элбээбитин бэлиэтиибит. Хааччахтыыр миэрэлэри тутуһаргытыгар көрдөһөбүн», – диэтэ баһылык.
Суһал штаб мунньахха вакцинация ыытыытын тула ордук болҕомто уурда. Баһылык доруобуйа харыстабылын министиэристибэтигэр дьаһалы оһуобай хонтуруолга тутары сорудахтаата. Бу күннэргэ Саха сиригэр бастакы баайыы 200 доза аҕалыллыбыта. «Кыһыл зонаҕа» үлэлиир медиктарга ананар. Эбии 500 доза кэллэ – маркировка кэнниттэн эмиэ эмтиир тэрилтэлэринэн тарҕаныаҕа.
