Саха сирин баһылыга Айсен Николаев Уус Алдан улууһугар өрөспүүбүлүкэ кэлэр ититэр болдьоҕор бэлэмнэниитигэр сүбэ мунньаҕы ыытта.
«Уопсай бэлэм буолуу 57%-нын ылар, үлэ уопсайынан кыраапык быһыытынан барар. Үлэ барыта болдьоххо түмүктэниэхтээх, оттон муниципалитеттар уонна тэрилтэлэр ититэр кэмҥэ бэлэмнэрин бигэргэтиэхтээхтэр. Оройуоннар баһылыктара бэлэмнэнии болдьоҕун уонна хаачыстыбатын тутуһалларыгар, тустаах биэдэмистибэлэр уонна тэрилтэлэр салайааччылара тус эппиэтинэстээхтэр», — диэн Айсен Николаев сэрэттэ.
Быйылгы навигацияҕа энергетика уонна хомунаалынай хаһаайыстыба наадатыгар 523 тыһыынчаттан тахса туонна уматыгы тиэрдиэхтээх. Былырыыҥҥыттан түргэн тэтим — хайыы-үйэ былааннаммыт кээмэй 40-ча бырыһыана ыытылынна.
«Россия президенэ Владимир Владимирович Путин быһаарыыларынан уонна дойду бырабыыталыстыбатын өйөбүлүнэн чугастааҕы күннэргэ өрөспүүбүлүкэ өссө 5 млрд солк. казначейскай кирэдьиит ылыаҕа. Бу үбү тута уматыгы атыылаһыыга уонна тиэрдиигэ ыытарга, оттон ниэп бородууктатын аҕалыы хаамыытын күннээҕи хонтуруолга тутарга сорудахтаатым», — диэн Саха сирин баһылыга бэлиэтээтэ.
Мунньахха үп-харчы боппуруостарын туспа көрдүлэр. Муниципальнай тэриллиилэр уонна судаарыстыбаннай тэрилтэлэр хомунаалынай өҥө иһин иэстэрэ 2 миллиард солкуобайга чугаһаата.
«Бу үп хомунаалынай уонна энергетическэй тэрилтэлэргэ кыстыкка бэлэмнэнэргэ наада. Атырдьах ыйын 1 күнүгэр диэри иэһи кыччатыыга чопчу дьаһаллары ыларга сорудахтаатым. Бу үлэ сүрүн түмүгэ — ититэр сезону эрэллээхтик ааһыы, олох-дьаһах ситимин бүтүннүүтүн тохтоло суох үлэлэтии уонна өрөспүүбүлүкэ олохтоохторун олохторун хаачыстыбатын тупсарыы», — диэн Айсен Николаев тоһоҕолоон бэлиэтээтэ.
