Саха сиригэр сайыҥҥы халаан уута өрөспүүбүлүкэтээҕи массыына суолларын 15 учаастагар алдьатыыны таһаарда. Билиҥҥи кэмҥэ олортон 12-тэ толору чөлүгэр түһэрилиннэ. Хаалбыт үс учаастакка айан-сырыы билигин бобуллар: манна уу таһымын суукканы эргиччи кэтээн көрүү уонна саахалы туоратар-чөлүгэр түһэрии үлэлэрэ ыытыллаллар. Бу туһунан брифиҥҥэ СӨ тырааныспарга уонна суол хаһаайыстыбатыгар миниистирин солбуйааччы Владимир Тихонов иһитиннэрдэ.
Миниистири солбуйааччы этэринэн, үлэ тэтимин өр кэмҥэ түһэр ардахтар уонна уу үрдүк таһыма харгыстаабыттара — ыарахан тиэхиньикэни туһанар кыах суоҕа.
«От ыйын 27 күнүгэр уонна балаҕан ыйын 5 күнүгэр федеральнай «Халыма» айан суолугар сир сиҥнэн түһүүтэ уонна хайаттан таас халҕаһалаан түһүүтэ таҕыста. Бу Хаандыга уонна Уус-Ньара бөһүөлэктэр икки ардыларыгар массыына сырыыта икки өттүттэн тохтууругар тиэрдибитэ. «Бүлүү» суол тэрилтэтэ уонна бэдэрээтчит тэрилтэлэр түргэнник быстах кэмҥэ сылдьар суоллары оҥорон биэрбиттэрэ уонна саахалы туоратар-чөлүгэр түһэрии үлэлэрин ыыппыттара. Бу учаастактарынан сырыы от ыйын 31 күнүгэр уонна балаҕан ыйын 7 күнүгэр толору чөлүгэр түспүтэ. Балаҕан ыйын 9 күнүгэр эмиэ хайаттан сиҥнии суолу бүөлээбитэ. Саахалы туоратар биригээдэлэр бу күн суолу толору чөлүгэр түһэрбиттэрэ», — диэн миниистири солбуйааччы кэпсээтэ.
Ордук элбэх хоромньуну Үөһээ Дьааҥы улууһун олохтоох муниципальнай суоллара ылбыттар: улуус биэс нэһилиэнньэлээх пуунугар суол бүрүөһүнэ алдьаммыта бэлиэтэммит. Докумуоннар оҥоһулуннулар, билигин судаарыстыбаннай экспертиза бара турар.
Сунтаар улууһугар эмиэ суоллар суураллыбыттара. Нэһилиэнньэлэр икки ардыларынааҕы суоллары муниципалитет күүһүнэн чөлүгэр түһэрдилэр. Сунтаар сэлиэнньэтин иһинээҕи суолларга аакталар толоруллубуттар уонна докумуоннара оҥоһуллубут, ону эмиэ судаарыстыбаннай экспертизаҕа ыыттылар.
Уус-Маайа улууһугар Эдьээн уонна Күп сэлиэнньэлэргэ чөлүгэр түһэрии үлэлэригэр 28,9 мөлүйүөн солкуобай наада. Олохтоох суолларынан уопсай хоромньу суумата 57,9 мөлүйүөн солкуобайга тэҥнэһэр.
«Муниципальнай улуустар чөлүгэр түһэрии үлэлэрин алтынньы 15 күнүгэр диэри бэйэлэрин үптэрин суотугар бүтэриэхтээхтэр, ороскуоттарын кэлин өрөспүүбүлүкэ бүддьүөтүттэн толуйтарыахтара», — диэн Владимир Тихонов быһааран биэрдэ.
