Саха сиригэр ааспыт сууккаҕа ойуурга саҥа уот туруута бэлиэтэммэтэ. Уопсайа 47 гектар иэннээх сиргэ биэс ойуур баһаара умуруорулунна.
Саха сирин экологияҕа, айылҕаны туһаныыга уонна ойуур хаһаайыстыбатыгар миниистирин солбуйааччы Андрей Коноплев брифиҥҥэ иһитиннэрбитинэн, бэс ыйын 11 күнүн сарсыардатыгар өрөспүүбүлүкэҕэ 720 гектарга үс ойуур баһаара баар. Бу баһаардары умуруоруу дьаһала ЫБММ (КЧС) быһаарыытынан тохтотулунна: ыраах, суола-ииһэ суох уонна хайалаах сиргэ бааллар.
Ойуур баһаардарын хонтуруоллааһыҥҥа авиационнай мониторинг ыытыллар. Амма, Дьааҥы, Үөһээ Бүлүү, Горнай, Ленскэй, Мииринэй, Мэҥэ Хаҥалас, Ньурба, Өлүөхүмэ, Сунтаар, Хаҥалас, Кэбээйи, Таатта, Чурапчы, Томпо, Уус Маайа, Уус Алдан улуустарыгар уонна Дьокуускай куорат киин өттүгэр 13 салгын суудуната кэтээн көрүүнү оҥорор.
Баһаартан сэрэхтээх буолуу сезона саҕаланыаҕыттан, Саха сиригэр 67 ойуур баһаара (3,4 тыһ. гектар) регистрацияламмыт. Ааспыт сылга бу кэмҥэ 137 баһаар (49 тыһ. гектар) бэлиэтэммит.
Кэбээйи, Муома, Орто Халыма, Таатта уонна Эбээн Бытантай улуустарыгар ураты баһаартан сэрэхтээх буолуу эрэсиимэ салгыы үлэлиир. Сыл саҕаланыаҕыттан ойуурга баһаартан сэрэхтээх буолуу быраабылатын 82 кэһии тахсыбыта билиннэ. 1 мөлүйүөн солкуобайтан тахса суумалаах ыстарааптар түһэрилиннилэр. Билигин 11 ойуур баһаарын төрүөтүн таһаарбыт дьон быһаарылыннылар.
Ойуур харыстабылыгар РСЧС тиһигэ штатнай эрэсииминэн үлэлиир. Ойуурга баһаары көрдөххүтүнэ, тута Ойуур хаһаайыстыбатын региоҥҥа диспетчерскэй сулууспатыгар 44-74-76 нүөмэргэ эрийиҥ. Ойуур харыстабылын биир кэлим нүөмэригэр: 8-800-100-94-00 эрийиэххэ сөп.
