Саха сирин ИДьМ үлэһиттэрэ Өймөкөөн улууһугар үлэлиир кэллиэгэлэрин кытта күндү металлары сокуоннайа суох эргиниини тохтоттулар. Бу туһунан Саха сирин ИДьМ пресс-сулууспата иһитиннэрэр.
«Халыма» федеральнай суол 926-с килэмиэтиригэр полиция үлэһиттэрэ Scania грузовигы тохтоттулар. Массыынаны Бурятияттан сылдьар 48 саастаах киһи урууллаан испит, оттон хабыынаҕа — Подмосковьеттан кыһыл көмүһү хостуур бэдэрээттиир тэрилтэ учаастагын 35 саастаах начальнига олорбут.
Бырысыапка баар вагончикка оперативниктар кыһыл көмүстээх алта контейнеры булбуттар. Экспертиза быһаарбытынан, бу барыта холбоон алта киилэ кэриҥэ ыйааһыннаах россыпной шлиховой кыһыл көмүс. Кини сыаната 58 мөлүйүөн солкуобайга тэҥнэһэр.
Быһаарбыттарынан, күндү металл Өймөкөөн улууһугар Дириҥ-Үрях үрэх учаастагар Уус-Ньара бөһүөлэгиттэн 80 км тэйиччи хостоммут. Бэдэрээттиир тэрилтэ 2024 сыллаахха лицензиятын былдьаппыт олохтоох хампаанньа сакааһынан көҥүлэ суох үлэлээбит. Сокуоннайа суох хостооһуну геологическай чинчийии диэн быһаарса сатаабыттар. Хостоммут концентраты атын сиргэ илдьибиттэр.
Вахтовай бөһүөлэги уонна производственнай учаастагы полиция үлэһиттэрэ көрбүттэр уонна хостооччулар техникаларын уонна оборудованиеларын туппуттар: икки погрузчик, бульдозер, сууйар прибор уонна төрүтэ биллибэт “слитоктары”.
Беспилотниктар көмөлөрүнэн хостооһун хаамыытын салгыҥҥа устубуттар — оборудование турар сирин, учаастактары уонна бэлэмнэммит боруодалар иэннэрин координаттарын быһаарбыттар.
РФ Холуобунай кодексатын 191 ыстатыйатын 5 чааһынан (күндү металлары сокуоннайа суох эргинии) холуобунай дьыала көбүтүллүбүт. Оперативнай-ирдиир уонна силиэстийэлиир үлэлэр ыытыллаллар, буруйу оҥорууга кыттыгастаах дьону быһаараллар.
