14 От ыйа 14.07
  • 19°
  • $ 87,74
  • 95,76

«Саха КВН» оонньууларын XXIII-с сезонун чемпионунан «Дьүлэй дьээбэлэрэ» буоллулар

14:27, 17 апреля
Текст:
Хаартыска: Ааптар тиксэриитэ
Читайте нас на
Яндекс Новости
ЯДВ

Мэҥэ Хаҥалас Майатыгар Дмитрий Ходулов аатынан култуура киинигэр муус устар 4 уонна 5 күннэригэр көр-күлүү, айар талаан уонна тобуллаҕас өй түһүлгэ олохтонно. Икки күннээх, түөрт түһүмэхтээх тыҥааһыннаах оонньуу кэнниттэн бастыҥнар ааттаннылар.

XXIII-с өрөспүүбүлүкэтээҕи оскуола оҕолорун «Саха КВН» оонньууларын финала сэттэ улуустан: Тааттаттан, Амматтан, Чурапчыттан, Уус Алдантан, Мэҥэ Хаҥаластан, Горнайтан уонна Ньурбаттан аҕыс хамаанданы түмтэ. Чопчулаан бэлиэтиир буоллахха, бу ааттаммыт улуустар кыһыҥҥы уонна сааскы кэмҥэ улуустааҕы сүүмэрдиир этаптарын тэрийбиттэрэ. Иннэ гынан сылын ахсын финалга ордук бэлэмнээх, чаҕылхай бырагыраамалаах, талааннаах оонньооччулардаах хамаандалар тахсаллар.

«Сахалыы тыллаах КВН оонньууларын сайыннарыан баҕалаах, сахалыы айар эйгэни олохсутарга интэриэстээх улуустарга «Саха КВН оскуолатын биир күнэ» диэн үөрэтэр-сайыннарар түмсүүлэри тэрийэбит. Оонньуур маастарыстыбаны үрдэтиигэ, бырагырааманы таҥан оҥорууга, сыанаҕа үлэлиир дьоҕуру арыйыыга сүрүн болҕомтону уурабыт. Ол барыта түмүк оонньууга көстөр», – диэн кэпсиир Саха Өрөспүүбүлүкэтин «Саха КВН Лигата» ыччат уопсастыбаннай тэрилтэтин бэрэссэдээтэлэ Геннадий Охлопков.

Кыттааччылар «Эҕэрдэлэһии», «Триатлон», «Биир нүөмэр түһүмэҕэ», «Музыкальнай дьиэҕэ сорудах» диэн түһүмэхтэринэн бырагыраамаларын киэҥ дьүүлгэ таһаардылар, бастыҥ көрүдьүөстэринэн көрөөччүлэри уонна дьүүллүүр сүбэни сөхтөрдүлэр. Онтон хас биирдии реприза, миниатюра, нүөмэр сыанаҕа тахсыан иннинэ эрэдээксийэни ааһарын, чочулларын биитэр сарбылларын үгүс киһи билбэт буолуохтаах.

«Былырыыҥҥы оонньуутааҕар быйылгы финал таһыма быдан үрдүк. Ааттаах-суоллаах, урукку өттүгэр балайда ситиһиилээх хамаандалар бу да сырыыга инники күөҥҥэ тахсыахтара дии санаабыппыт, онуоха саҥа ааттар ордук сэргэхтик көһүннүлэр. Кыайбыт «Дьүлэй дьээбэлэрэ» хамаанда бары өттүнэн чаҕылхайдык көһүннэ уонна, атыттарга холоотоххо, лаппа элбэх баалынан утарсааччыларын кэннигэр хаалларда. Сыанаҕа тутта-хапта сылдьаллара, уорбараска киирэллэрэ, нүөмэрдэрин итэҕэтиилээхтик толороллоро уонна, ордук, ыллыыр дьоҕурдаахтара барыбытын сөхтөрдө», – диэн быһааран кэпсиир «Саха КВН» оонньууларын шеф-эрэдээктэрэ, тэрээһин сүрүн көҕүлээччитэ Евгений Филиппов.

«Саха КВН» финал оонньууларын чэрчитинэн сылын ахсын СӨ оҕо быраабын араҥаччылыыр болумуочунайын анал кубога оонньонор. Үтүө үгэскэ кубулуйбут дьаһал үүнэр көлүөнэ бэйэтин быраабын билэригэр, олоҕурбут сыаннастары иҥэринэ улаатарыгар уонна билиҥҥи кэмҥэ ханнык сайдар саҕахтар баалларын билэ үөрэнэригэр туһуланар. «Кырдьыгы – күлүүлээхтик» диэн девизтээх анал кубок быйылгы сыллаах хаһаайынынан Мэҥэ-Хаҥалас улууһун В.П.Ларионов аатынан Майа орто оскуолатын «Мэник мэҥэлэр» хамаандата буолла.

«Мэник мэҥэлэр» хамаанда өр тохтуу сылдьан баран, 2022 сылтан «Саха КВН» оонньуутугар эргиллэр. Мин бэйэм хамаанда састаабыгар оскуолаҕа үөрэнэ сылдьан үс сыл оонньообутум. Билигин үөрэммит оскуолабар үлэлии кэлэн, «Саха КВН» хамсааһынын саҕалыам этэ диэн санаалаах урукку хамаандабытын сөргүттүм. Быйыл өрөспүүбүлүкэ таһымыгар бастакы холонуубут буолар уонна тута ситиһии кэллэ. Ол курдук, СӨ оҕо быраабын араҥаччылыыр болумуочунайын анал кубога ылар чиэскэ тиксибиппититтэн олус үөрдүбүт! Махтал буоллун тэрийээччилэргэ, дьүүллүүр сүбэҕэ, эрэдээктэрдэргэ уонна болумуочунай Т.В. Васильеваҕа», – диэн сэһэргиир хамаанда салайааччыта Иннокентий Кондаков.

Тэрийэр бөлөх аатыттан финалга кыттыбыт бары хамаандаларга барҕа махталбытын тиэрдэбит, инникитин элбэҕи эрэйэ хаалабыт. Эһиги, күндү КВН-щиктар уонна ытыктабыллаах салайааччылар, Саха КВН-ы хамсатар сүдү күүс буоларгытын умнумаҥ! Итиэннэ истиҥ тылларбытын аныыбыт тэрээһини өйөөбүт уонна тэрийсибит күндү дьоммутугар Мэҥэ Хаҥалас улууһун үөрэҕириигэ салалтатыгар, «Мэҥэ кэскилэ» оҕо уонна ыччат уопсастыбаннай хамсааhын улуустааҕы сүрүннүүр киинигэр, СӨ үөрэҕин уонна наукатын министиэристибэтигэр, СӨ ыччат дьыалатын уонна социальнай коммуникацияларга министиэристибэтигэр уонна СӨ оҕо быраабын араҥаччылыыр болумуочунайыгар!

Оонньуу туһунан сиһилии билиһиннэрэр видеону манна көрүҥ: https://youtu.be/_KBXC-ZR5F8?si=5w_sJijEWVGlEX1W

КЫАЙЫЫЛААХ МИЭСТЭЛЭР
I миэстэ «Дьүлэй дьээбэлэрэ» Таатта улууһун И.Н.Гуляев аатынан Туора-Күөл орто оскуолатын хамаандата
II миэстэ «Көрдөөх иглс» Уус-Алдан улууһун В.В.Алексеев аатынан Мүрү уолан гимназиятын хамаандата
III миэстэ «Чиккэстэр» Мэҥэ-Хаҥалас улууһун С.Н. Михайлов аатынан Чыамайыкы орто оскуолатын хамаандата
СӨ ОҔО БЫРААБЫН АРАҤАЧЧЫЛЫЫР БОЛУМУОЧУНАЙЫН

АНАЛ КУБОГЫН ХАҺААЙЫНА

Кыайыылаах «Мэник мэҥэлэр» Мэҥэ-Хаҥаластар улууһун В.П.Ларионов аатынан Майа орто оскуолатын хамаандата
АНАЛ ААТТАР КЫАЙЫЫЛААХТАРА
«Алтан чуораан» «Мэник мэҥэлэр» Мэҥэ-Хаҥаластар улууһун В.П.Ларионов аатынан Майа орто оскуолатын хамаандата
«Мэкчиргэ мэйии» «Инь-янь» Горнай улууһун С.П.Данилов аатынан Бэрдьигэстээх орто оскуолатын хамаандата
«Наара суох» «Хадаар абытайдара» С.Д.Флегонтов аатынан Хадаар орто оскуолатын хамаандата
«Бастыҥ эҕэрдэлэһии» «Ил эйэ» Ньурба улууһун Николай Чуор аатынан култуура киинин хамаандата
«Саха КВН эрэлэ» «Моккуойдар» Амма улууһун Е.С.никитина аатынан Алтан орто оскуолатын хамаандата
БИИРДИИЛЭЭН ЧАҔЫЛХАЙ

ООННЬООЧЧУЛАРГА АНАЛ ААТТАР

«Көрдөөх көкөт» Дмитрий Анастатов «Көрдөөх иглс» хамаанда оонньооччута
«Күн күлүүк» Александра Сыромятникова «Мэник мэҥэлэр» хамаанда оонньооччута
«Бастыҥ куолас» Айгуль Прокопьева «Дьүлэй дьээбэлэрэ» хамаанда оонньооччута
«Дорҕоон доҕор» Анастасия Романовна «Чиккэстэр» хамаанда топера
«Саталлаах саарын» Геннадий Кононович Васильев «Дьүлэй дьээбэлэрэ» хамаанда салайааччыта

СИА саайтыгар анаан Саха Өрөспүүбүлүкэтин «Саха КВН Лигата» ыччат уопсастыбаннай тэрилтэтин пресс-сулууспата суруйда.

Следите за самым важным и интересным в Telegram-канале и WhatsApp-группе ЯСИА