«Якутия с тобой!» көмө штабыгар дьахталлар өрөспүүбүлүкэттэн быстах байыаннай хомуурга барбыттарга икки тыһыынчаттан тахса таҥаһы тиктилэр. Ол ортотугар аптечекалар, утуйар мөһөөччүктэр, үрүксээктэр, атах таҥастара, шарфиктар. Тигиллибит маллары үксүн саха саллааттарыгар ыыттылар. Бу туһунан СИА-ҕа штаб бэрэссэдээтэлэ Ирина Саввина иһитиннэрдэ.
«Биһиги 1000 аптечка тиктибит, 200 кэриҥэ олбоҕу. Бу күннэргэ сылаас флисовай көстүүмнэри оҥорон саҕалаатыбыт. Сотору маны барытын саллааттарбытыгар атын таҥаһы-сабы кытары ыытыахпыт», — диэн Ирина Саввина бэлиэтээтэ.
Дьахталлар сарсыарда 9- тан киэһэ 7-ҕэ диэри үлэлииллэр. Барыта 20 волонтер иистэнньэҥ көмөлөһөр.
