Улахан өрөмүөн кэнниттэн «Черскэй» аэропорт арылынна. Киин куораттан көппүт бастакы сөмөлүөт саҥардыллыбыт аэропорка түстэ диэн НВК Саха телеграм-ханаал суруйар.
Аэропорт аһыллыыта видеосибээс көмөтүнэн ыытылынна. Тэрээһиҥҥэ РФ бырабыыталыстыбатын бэрэссэдээтэлин солбуйааччы Марат Хуснуллин, РФ тырааныспарга миниистирин солбуйааччы Василий Десятков уонна Саха сирин Ил Дархана Айсен Николаев кыттыыны ыллылар.
Черскэй аэропордугар 1 630 м уһуннаах, искусственнай бүрүөһүннээх саҥа көтөр-түһэр балаһаны туттулар, ону тэҥэ күнү-дьылы кэтиир оборудованиены туруордулар.
Ону таһынан, уу сүүрэр, барар-кэлэр ханаалларын оҥордулар, аэропорт кытыл диэки өттүн бөҕөргөттүлэр.
