«Өлүөнэ күргэтигэр үлэлэр кыраапыгынан бараллар. Быйылгы былааҥҥа — коффердамнары өрүс сүнньүгэр таһаарыы уонна сыбаайалары туруоруу. Онно 25 уонна 42 миэтэрэ уһуннаах сыбаайалар бааллар, олор коффердам иһигэр туруоруллуохтаахтар. Кинилэр күргэ өйөбүллэригэр тирэх буолуохтара. Быйыл 2027-2028 сыллардааҕы үлэлэргэ плацдармы оҥороору, тимир улахан аҥаарын атыылаһарбыт буолуо диэн эрэнэбит. Билигин тутууга 500-чэ киһи уонна 150-тан тахса тиэхиньикэ үлэлиир. Үлэ барар, тохтуу сылдьыбатаҕа. Өлүөнэ күргэтин суолтатын туһунан дойду бэрэсидьиэнэ эмиэ хаста да эппитэ. Бу олус улахан социальнай-экэнэмиичэскэй суолталаах саамай тутаах бырайыагынан буолар», — диэн бэлиэтээтэ Айсен Николаев.
Сааскы халаан уута кэлиэн иннинэ хаҥас кытылга харыстыыр буор эмпэрэ тутуллар, быстах кэмнээҕи причал шпуннарын уонна турбаларын түһэрии түмүктэннэ. Уҥа кытылга суудуналар чугаһыылларыгар, тиэхиньикэни уонна матырыйааллары тиэйэргэ наадалаах причалы оҥороллор, ону тэҥэ №11 уонна №12 тирэхтэргэ аналлаах былаһааккалары куталлар. Өлүөнэ күргэтин саамай уустук килиимэт усулуобуйатыгар ураты инженернай быһаарыылары туһанан туталлар. Эбийиэк Саха сирин уонна бүттүүн Уһук Илин инники сайдыытыгар тирэх буолуоҕа, территориялар ситимнэһиилэригэр уонна нэһилиэнньэ олоҕун хаачыстыбата тупсарыгар мэктиэ буолуоҕа. 2025 сылга кини «Олох-дьаһах инфраструктурата» национальнай бырайыакка киллэриллибитэ.
