«Үс Хатыҥ» архитектурнай-этнографическай комплексыгар «Туймаада Ыһыаҕа — 2026» национальнай бырааһынньыкка ипподром диэки өттүттэн саҥа киирэр сири аһар былааннаахтар. Бу туһунан Дьокуускай куорат уокуруктааҕы дьаһалтатын Култуураҕа уонна духуобунаска сайдыытын управлениетын начаалынньыга Сардана Брызгалова иһитиннэрдэ.
Бу уларытыы сүрүн киирэр ааны күүстээх ноҕуруускаттан босхолуур уонна ыалдьыттарга табыгастаах усулуобуйаны тэрийэр соруктаах. Киирэр арканы оҥоруунан маастар Алексей Капитонов уолаттарын кытта дьарыктанар.
Киирии киэргэтиитигэр ортотугар 12 сэргэни туруорар былааннаахтар. Сэргэ саха норуотугар үс эйгэни холбуур Аан Ийэ дойду көстүүтэ, айыылары, харыстааччы иччилэри уонна өбүгэлэри кытта ситимниир суолталаах. Тэрээһин ыалдьыттара манна алгыс сиэрин-туомун ааһыахтарын сөп.
Тэрийээччилэр өссө биир сонун киллэрэллэр — киирии аркалартан ыһыах сүрүн түһүлгэтигэр тириэрдэр гольфкардар үлэлиэхтэрэ. Drivee сервиһин кытта бииргэ үлэлээһин түмүгэр, элбэх киһи мустубут кэмигэр, дьон сылдьара табыгастаах уонна түргэн буоллун диэн ылыллыбыт быһаарыы буолар.
Санатан эттэххэ, Туймаада Ыһыаҕа бэс ыйын 27 уонна 28 күннэригэр ыытыллыаҕа. Быйылгы бырааһынньык РФ Президенэ Владимир Путин биллэрбит Арассыыйа норуоттарын сомоҕолоһууларын сылыгар уонна Саха Өрөспүүбүлүкэтин Ил Дархана Айсен Николаев биллэрбит Култуура сылыгар ананар.
