19 От ыйа 19.07
  • 21°
  • $ 87,88
  • 96,1

СӨ Бырабыыталыстыбатын бэрэссэдээтэлэ Андрей Тарасенко бүгүн Чурапчыга үлэлиир

Читайте нас на
Яндекс Новости
ЯДВ

Сарсыарда ЧГИФКСИ саалатыгар Саха АССР, РСФСР, ССРС үтүөлээх тириэньэрэ Дмитрий Петрович Коркин 95 сылыгар аналлаах үбүлүөйдээх тэрээһин боппуруостарынан мунньахтаата.

Улууска үбүлүөйдээх даатаны көрсө үгүс үлэ ыытыллыахтаах. Ол курдук, успуорт оскуола аттыгар «Олимпиецтар сквердэрэ», Чурапчыга киириигэ «Устуоруйа аллеята» тутуллуохтаахтар, Ыспартыыбынай түөлбэ инфраструктурата сайдыахтаах.

Мунньахха бу түөлбэҕэ гааһы киллэрии, суолу асфаллааһын уонна Ыспартыыбынай Албан аат мусуойун судаарыстыбаннай мусуойдар реестрдэригэр киллэрии боппуруостара турдулар. ЧГИФКСИ ректора Иннокентий Готовцев Дмитрий Коркин тириэньэрдиирин таһынан науканан дьарыктаммытын бэлиэтээн туран, научнай-практическай конференцияны тэрийиэххэ диэн этии киллэрдэ. Андрей Тарасенко этиилэри истэн баран, успуорт министиэристибэтигэр 10 күн иһинэн тэрээһиннэр былааннарын оҥорон, киллэрэллэригэр эттэ.

Маны таһынан Оскуола-интэринээт томторун ирбэт тоҥо ирэн, сирэ алдьанан эрэрин көрдөрдүлэр. Салалта биэрэги бөҕөргөтүү наадатын туруорустулар. Андрей Тарасенко суругунан этиилэри киллэрэргэ эттэ.

Бүгүн эбиэккэ диэри Андрей Тарасенко Мындаҕаайыга Халбааныкы сайылыгар, Кыстык Кугдаҕа сылдьыаҕа уонна оскуола тутуутун көрүөҕэ. Чурапчыга төннөн кэлэн, оттооһун мунньаҕын ыытыаҕа, «Чурапчы» ТХПК үүт уонна халбаһы астыыр сыаҕар сылдьыаҕа.

Салгыы Хадаарга Хатыҥ Арыылаахха туораахтаах култуура үүнүүтүн, оттуур ходуһалары уонна тутулла турар Сайдыы киинин көрүөҕэ.

Елена Макаринская

Саҥа Олох

Следите за самым важным и интересным в Telegram-канале и WhatsApp-группе ЯСИА