Дойду бастыҥ үрдүк үөрэх кыһатыгар үөрэниэххин баҕарар буоллаххына, өрөспүүбүлүкэтээҕи олимпиадаҕа кытын. Бу күннэргэ хайыы-үйэ 13-с төгүлүн ыытыллар. Саха сирэ каадырдары тус сыаллаан бэлэмнээһини 25 сыл устата ыытан кэллэ.
СӨ Үөрэхтээһиҥҥэ уонна наукаҕа министиэристибэтэ Россия 32 куоратыгар 52 үрдүк үөрэх кыһатын кытта бииргэ үлэлиир. Бүгүн 1600 устудьуон өрөспүүбүлүкэ таһыгар уонна 1300 – өрөспүүбүлүкэ иһигэр үөрэнэллэр.
Бу күннэргэ Дьокуускайга киин кыһалар – Санкт-Петербурдааҕы университет, Герцен аатынан Россия судаарыстыбаннай педагогическай университета, Иркутскайдааҕы национальнай-чинчийэр техническэй университет, Санкт-Петербурдааҕы судаарыстыбаннай электротехническэй университет оскуоланы бүтэрээччилэри кытары көрсүһэллэр.
Кинилэр өрөспүүбүлүкэбит преоподавателлэрин кытта үлэлэри бэрэбиэркэлииллэр. Бэҕэһээ 11 кылаастарга олимпиада түмүктэммитэ, манна 700 тахса оҕо кыттыбыта.
— Олимпиада үгэс курдук икки түһүмэҕинэн ыытыллар. Бастакыга түөрт зонанан кыайыылаахтар быһаарыллаллар. Кинилэр салгыы талыыга кытталлар уонна сайын бэйэлэрин икки ардыларыгар күрэстэһэллэр, — диэн бэлиэтээтэ министиэристибэ отделын салайааччыта Альберт Черкашин.
Бүгүн Россия 26 үрдүк үөрэҕин кыһата тус сыаллаах миэстэлэри биэрэрин бигэргэттэ.
