Дьокуускай куоракка эдэр худуоhунньук Роман Марков «Cold Art» галереяҕа өбүгэ ыhыаҕын ойуулаан көрдөрдө. Дорҕоон уонна өҥ аптаах эйгэтэ киһи сүрэҕин таарыйар.
Айар үлэ чуумпу дорҕоонугар, кумааҕы сипсийэригэр уонна киистэ холустаҕа эргичиҥнииригэр, айылҕа кэрэтэ уонна саха омук уобараһа, норуот тыына тиллэр хартыыната төрүүр. Бу көннөрү уруһуйдааһын эрэ буолбатах — бу өбүгэ дойдутугар иэйии куттаах айан.
Роман Марков СИА ааҕааччыларыгар анаан кэпсээтэ:
— Кыра эрдэхпиттэн уруhуйдуурбун сөбүлүүбүн. Тоҕус сааспар худохественнай лиссиэйгэ үөрэнэ киирбитим. Онтон оскуоланы бүтэрэн баран, салгыы ити хайысхабынан училищеҕа туттарсыбытым. Үөрэҕим кэнниттэн, иллюстрациянан дьарыгырбытым. Ону кытары комикстары сурунаалга уонна хаhыакка оҥорор буолбутум. Олоҥхо тиэмэтинэн интерактивнай комикс оҥорор бөлөх тэриммиппит. Онтон киинэ эйгэтигэр үлэҕэ ыҥырбыттара. «Тыгын Дархан» диэн киинэҕэ раскадровщигынан үлэлээбитим. Билигин «Cold Art» диэн галереялаахпыт.
Хаартыска ааптар тиксэриитэ.
Ааптар: Дайаана Апросимова
