65 киилэҕэ диэри ыйааһыҥҥа олимпийскай эрэл училищетын иитиллээччитэ Айсен Потапов Бурятия икки бөҕөһүн — Чингиз Цыренжаповы, Эрдем Шарастепановы — утуу-субуу хотуталаан, финал аҥарыгар Тумур-Очир Тулганы (Монголия) кытта тахсан туһунна. Санатар буоллахха, монгол баатыра быйыл Тахти Кубогын хаһаайынынан буолбута. Онон Дьокуускайга даҕаны кыһыл көмүс мэтээли ыла кэлбитэ сэрэйиллэр. Оннук да буолуох курдук — үтүһүүлээх-анньыһыылаах хапсыһыыга Айсены 9:2 ахсаанынан хотто.
Эрэхтээх уонна кыайыылааҕы быһаарар түмүк хапсыһыылар бүгүн, кулун тутар 3-гэр, субуотаҕа, буола тураллар.
