Олоххо көхтөөх көрүүлээх устудьуоннарга истипиэндьийэ кээмэйэ:
- 1-2 кууруска үчүгэй үөрэхтээхтэргэ 5770 солк.
- 1-2 кууруска туйгун үөрэхтээхтэргэ 6090 солк.
- 3 кууруска үчүгэй үөрэхтээхтэргэ 6035 солк.
- 3 кууруска туйгун үөрэхтээхтэргэ 6350 солк.
- 4 кууруска үчүгэй үөрэхтээхтэргэ 6250 солк.
- 4 кууруска туйгун үөрэхтээхтэргэ 6620 солк.
- 5 кууруска үчүгэй үөрэхтээхтэргэ 6565 солк.
- 5 кууруска туйгун үөрэхтээхтэргэ 6880 солк.
- 6 кууруска уонна магистратураҕа үчүгэй үөрэхтээхтэргэ 6880 солк.
- 6 кууруска уонна магистратураҕа туйгун үөрэхтээхтэргэ 7410 солк.
- Ыстаарыстаҕа 500 солк эбии төлөнөр.
Үрдэтиллибит истипиэндьийэ кээмэйэ: үөрэх уонна наука өттүнэн 14040 солк, уопсастыбаннай үлэ, култуура, спорт хайысхатынан 9180 солк.
Физическэй култуура институтун магистрана Вика Романова (Мэҥэ Хаҥалас, Чүүйэ):
— Үрдэтиллибит истипиэндьийэни иккис куурустан ылабын. Бокска Уһук Илин уокурук 2 төгүллээх, Дьокуускай куорат чөмпүйүөнэбин, ХИФУ уонна СССС бокска икки төгүллээх кыайыылааҕабын, Исмаилов кэриэһигэр ыытыллар Бүтүн Арассыыйатааҕы турнирга 3 миэстэлээхпин, К.Коротков аатынан норуоттар икки ардыларынааҕы күрэхтэһии кыттыыллааҕабын. Үрдэтиллибит истипиэндьийэ спортсменнарга эбии көҕүлээһин буолар. Төһө үрдүк көрдөрүүлээххин даҕаны, истипиэндьийэ эмиэ оннук. Ыйдааҕы истипиэндьийэни эмиэ ылабын. Үрдэтиллибит саҥа дьыл иннинэ түһэр. Ол иһин дьоммор кэһиилээх тиийэбин. Сорох оҕолор харчыларын мунньан массыына кытта ылаллар. Мин билигин мунньабын, ырам – массыына ыытарга быраап ылыы.
Физико-техническэй институт 4 кууруһун устудьуона Николай Местников (Уус Алдан, Бороҕон):
— Абитурам кэмигэр уопсайга олорор усулуобуйатынан, үп-харчы өттүнэн өйөбүлүнэн, үөрэтэр таһымынан сыаналаан ХИФУ-ты талбытым. Чинчийэр үлэни оскуола саҕаттан интэриэһиргиибин. «Актуальность создания авиакомпании малой авиации в условиях Крайнего Севера» диэн дакылааппынан Казань куоракка ыытыллыбыт «Поволжье ааҕыыларыгар» 2 миэстэлэммитим, онтон Санкт-Петербурга «Открой в себе ученого» кэмпириэнисйэҕэ бастаабытым. Бу идиэйэбинэн манна 2018-2019 сс. компания тэриллиэхтээх. Дьокуускай аэропордугар, “Якутия” авиахампаанньаҕа, “Полярнай авиалиния” тэрилтэлэргэ махталбын биллэрэбин.
ХИФУ үөрэнэр кэммэр тыал электростанцияларын, уу аччыгый электростанцияларын үөрэттим. Владивосток, Москва, Санкт-Петербург, Казань, Иваново, Анадырь, Благовещенскай, Новосибирскай, о.д.а куораттарга форумнарга, кэмпириэнсийэлэргэ ситиһиилээхтик кыттыбытым, салайааччыларбар, көмөлөспүт дьоммор махталым улахан. Үһүс куурустан үрдүк уонна Владимир Путин аатынан анал истипиэндьийэлээхпин. Университеппыт үөрэх туйгуннарын эрэ буолбакка, көхтөөх кыттааччылары, спортсменнары, чинчийээччилэри, саҥаны айааччылары өйүүрүттэн үөрэбин, барыбытыгар тэҥ кыах бэриллэр. Ол иһин бары устудьуоннарга уонна абитуралыы кэлээччилэргэ кими да күүппэккэ, олоххутун бэйэҕит оӊостуҥ диэм этэ. Харчынан маннык өйөбүл баара кими баҕарар кынаттыыр. Кэлэр кэмҥэ инвестиция — улахан инвестиция. Сири-дойдуну көрөрбүн, классиканы ааҕарбын, спортивнай харбааһыны сөбүлүүбүн. Соторутааҕыта истипиэндьийэбинэн дьоммор Кипрга сынньанар путевка бэлэхтээтим. Былыргы Рим улуу бэлиитигэ Марк Туллий Цицерон эппитинии, «Найдется ли кто-либо, кто, бросая целый день дротик, не попадет однажды в цель». Онон, саҥаттан саҥа ситиһиилэри баҕарабын! Университеппар, Евгения Исаевнаҕа бэйэ күүһүн арыйар усулуобуйабытын тэрийии иһин махталбын этэбин.
Математика уонна информатика институтун 4 кууруһун устудьуона Анита Аргунова (Булуҥ, Тиксии):
— ХИФУ – баҕа санааны толорор үөрэх кыһата. Манна ким баҕарар санаата сытар хайысхатын булуон сөп. Өрөспүүбүлүкэтээҕи лиссиэй-интэринээт кэнниттэн киирбитим. Бастакы үрдүк истипиэндьийэбин иккис кууруска науканан дьарыктанан, кэмпириэнсийэлэргэ кыттан, ыстатыйа суруйан ситиспитим. Салайааччым — Валентина Николаевна Эверстова. Ол иһин уһуннук ыралаабыт баҕа санаабын толорон, Соҕуруу Кореяҕа ыалдьыттаабытым. Науканы таһынан сөбүлүүр эйгэм – үҥкүү, Level Up устуудьуйаҕа преподавателлиибин, ХИФУ тэрээһиннэригэр, араас бэстибээллэргэ кыттабыт. Онон, иккис үрдүк истипиэндьийэм – айар үлэ хайысхатыгар. Истипиэндьийэбинэн быйыл Санкт-Петербург куоракка баран кэллим.
Мин санаабар, устудьуон саҥаны билэргэ дьулуһуохтаах, бириэмэтин таба аттарыахтаах, үөрэнэр кыһатын олоҕор көхтөөхтүк кыттыахтаах, ханнык куруһуоктар, тэрээһиннэр буолалларын билэ олоруохтаах.
Медицинскэй институт 4 кууруһун устудьуона Айсана Неустроева (Дьааҥы, Баатаҕай):
— Кыра эрдэхпиттэн эмчит буолуом диирим, сөбүлүүр үөрэхпэр үөрэнэ сылдьабын. Киһи эргиччи дьоҕурдаах, үгүс интэриэстээх буоллаҕына дьон-сэргэ биһирэбилин ылар. Университеппыт биһигини бары өттүнэн өйүүр, үөрэх таһынан эбии дьарыктаах оҕолорго ураты болҕомто уурар. Ону хайдах төлөһүөххэ сөбүй диэн бэйэм бэйэбиттэн ыйытааччым, уопсастыбаҕа туһалаах үлэһит буолаҥҥын дии саныыыбын.
Иллэҥ кэммэр Екатерина, Алексей Егоровтар салайар устуудьуйаларыгар дьарыктанабын. Онно улахан оҕолортон үрдүк истипиэндьийэ баарын туһунан истибитим. 2 куурустан ылан, үөрүүм үрдээбитэ. Тугу биэрэрий? Көҥүл буолары. Устудьуон кыра бырааттардаах, балыстардаах буоллаҕына, дьонуттан харчы көрдүүрэ уустук соҕус. Харчыны тутта үөрэнэҕин. Истипиэндьийэлээх карталарын сыл аҥаара, сыл да тыыппат оҕолор бааллар, сорохтор сонно тутталлар. Биллэн турар, күннээҕигэ ыытан кэбиспэт киһи ахсаана элбэх. Үрдэтиллибит истипиэндьийэлээх буолан, бэйэбин эрэх-турах сананабын. Үөрэхпин бүтэриэм өссө да балтараа сыл баар, онон, тутуспут суолбунан көхтөөх олоҕу талан, ситиһиилээхтик үөрэниэм диэн эрэллээхпин.
Финансовай-экономическай институт 4 кууруһун устудьуона Натали Сергеева (Мэҥэ Хаҥалас, Хорообут):
— Финансовай менеджмент идэтигэр үөрэнэбин. Оскуолаҕа үөрэнэ сылдьан чопчу бу эйгэни таларбын билэрим. Бастакы кууруска «Отчизна» гражданскай-патриотическай кулуупка киирбитим. Үһүс сылбар сэртипикээттэрбин, кырааматаларбын, махтал суруктарбын хомуйан хамыыһыйаҕа туттарбытым, истипиэндьийэлэммитим. Иккис кууруска «Гражданскай активация» диэн Крым федеральнай университет форумугар кыттыбытым. Уопсастыбаннай үлэҕэ ситиһиим иһин үөрэнэр кыһам Ороһуоспа өрөбүллэригэр сынньанар путевканан наҕараадалаабыта. Маннык истипиэндьийэ баара улахан көмө. Үөрэҕи тупсарарга, сөбүлүүр үлэнэн дьарыктанарга ураты кыаҕы биэрэр.
Хотугу норуоттар тылларын, култуураларын үөрэтэр институт 2 кууруһун магистрана Айаал Молокотин (Уус Алдан, Бороҕон):
— Култуура, айар үлэ диэнинэн, үрдэтиллибит истипиэндьийэни үһүс куурустан ылабын. Бастатан туран, ректорбытыгар Е.И.Михайловаҕа устудьуоннары өйүүрүгэр махтанабын. Үрдэтиллибит истипиэндьийэ баара биһигини көҕүлүүр. Людмила Степановна Ефимовалыын хаһыс да сылбытын «Кылыһах» фольклор бөлөҕөр университет, өрөспүүбүлүкэ ыытар култуурунай тэрээһиннэригэр көхтөөхтүк кыттабыт. Ону таһынан, араас тэрээһиннэргэ кыттабын, айар үлэнэн дьарыктанабын. Харчыбынан ноутбук ылыммытым, Москваҕа Ороһуоспатааҕы сынньалаҥҥа сылдьарбар туттубутум, Алтайга эспэдииссийэҕэ барарбар туһаммытым.
