Икки күн устата Одьулууннааҕы агротехникум кыһатыгар ыытыллыбыт күрэхтэһиигэ өрөспүүбүлүкэ араас муннуктарыттан 258 дуобатчыт кэлэн кытынна. Улуустарынан ааттаталыыр эбит буоллахха: Чурапчы, Сунтаар, Үөһээ Бүлүү, Муома, Хаҥалас, Таатта, Горнай, Мэҥэ-Хаҥалас, Нам, Уус-Алдан, Томпо, Дьокуускай куорат уонна куорат тулатынааҕы нэһилиэктэртэн муһуннулар. Кинилэр ортолоругар 7 гроссмейстер, 10-тан тахса ССРС уонна Россия спордун маастардара бааллар.
Гроссмейстер Мотрёна Ноговицынаттан күрэхтэһии туһунан санаатын үллэстэригэр көрдөстүм: «Гаврил Гаврильевич аатыгар улахан күрэхтэһии ыытыллыахтааҕын истэн олус үөрбүппүт. Кини биһиги улууска эрэ буолбакка, Россияҕа тиийэ биллэр биир чулуу дуобатчыппыт. Олус элбэх киһи кытынна, күүстээх дуобатчыттар бары кэриэтэ кэлбиттэр. Кыра саастаах оҕолортон саҕалаан спорт бэтэрээннэригэр тиийэ кытыннылар. Маннык улахан күрэс ыытыллара, уонна чуолаан төрөөбүт улууспутугар буолбута олус суолталаах. Кэлиҥҥи кэмҥэ дуобаты ыччакка пропагандалааһыҥҥа улахан үлэ ыытыллар дии саныыбын. Оҕолор ортолоругар кэскиллээх оонньооччулар тахсан иһэллэриттэн үөрэбин».
Күрэхтэһии аһыллыытыгар СР спорка миниистирэ М.Д. Гуляев, улуус депутаттарын Сэбиэтин бэрэссэдээтэлэ Я.П. Оконешников, улуус баһылыгын үп-харчы, инвестиция боппуруостарыгар солбуйааччы И.К. Матвеев, спорт управлениетын начальнига В.И. Давыдов мустубут дьону эҕэрдэлээтилэр. М.Д. Гуляев: «Бу күрэхтэһиигэ улахан таһымнаах дуобатчыттарбыт бары кэриэтэ кэлбиттэр. Чурапчы улууһун салалтата чуолаан, Одьулуун нэһилиэгин баһылыга Людмила Васильевна Ефремова, нэһилиэк олохтоохторо маннык улахан күрэхтэһиини тэрийбиттэриттэн астынным. Биллэн турар, энтузиаст дьонноох буолан маннык үрдүк таһымнаах күрэхтэһии ыытыллар. Ол курдук, бу күрэхтэһиигэ 7 убаһаны бириис быһыытынан туруордулар, манныгы атын ханнык да күрэхтэһиилэргэ чугаһынан өйдөөбөппүн. Кырдьык, дуобакка аан дойдуга аатырбыппыт биир төрдө – Одьулуунтан төрүттээх аан дойду чөмпүйүөнэ, аан дойдуга дуобат көрүҥэр саха омугу сэттэ төгүл ааттаппыт Гаврил Гаврильевич буолар. Кини бастакы сүдү кыайыытын 20 сылыгар анаммыт күрэхтэһиитигэ кытта кэлбит бары дуобатчыттарбытыгар ситиһиилэри баҕарабын», — диэтэ.
Күрэстэһиилэр сүрдээх тыҥааһыннаахтык бардылар. Хас биирдии дуобат дуоскатын судьуйалар да, көрөөччүлэр да кыраҕытык кэтээтилэр. Бастакы этээскэ 1999-02 сыллаах, ону тэҥэ 2003-2005 сыл уонна 2006 сылтан алын төрүөх оскуола оҕолоругар, бэтэрээн дьахталларга үрдүкү уонна бастакы лига оонньооччуларыгар анаан күрэхтэһии ыытылынна. Иккис этээс аактабай саалатыгар бэтэрээн эр дьоҥҥо үрдүкү, бастакы лига дуобатчыттара күрэхтэстилэр.
Турнир түмүктэнэр чааһыгар СР спорка миниистирин 1-кы солбуйааччы Г.Р. Балакшин, Ил Түмэн депутата, СР дуобакка федерациятын бэрэссэдээтэлэ А.А. Романов, Г.Колесов тренерэ, СР сүрүн тренерэ А. Азаров, Чурапчытааҕы физкултуура уонна спорт институтун ректора И.И. Готовцев кыайыылаахтары эҕэрдэлээтилэр уонна наҕараадалары туттардылар.
Георгий Балакшин: «Сүбэлэһэн баран, Гаврил Колесов аатынан республикатааҕы күрэхтэһиини үс сылга биирдэ буолбакка, сылын аайы ыытарга быһаардыбыт. Буолар сирэ уларыйа сылдьыан сөп, тоҕо диэтэххэ, Гаврил Колесов аата Россияҕа киэҥник биллэр. Маннык улахан турниры тэрийиигэ күүс-көмө буолбут дьоҥҥо, нэһилиэк баһылыгар Людмила Васильевнаҕа, улуус баһылыгар А.Т. Ноговицыҥҥа Спорт министиэристибэтин аатыттан истиҥ махталбын этэбин», — диэтэ.
1999-2002 сыллааҕы төрүөх кыргыттарга:
1 миэстэ – Аня Шишигина
2 миэстэ – Аля Большакова
3 миэстэ – Ира Варламова.
1999-2002 сыл төрүөх уолаттарга:
1 миэстэ – Валентин Иванов
2 миэстэ – Архан Титов
3 миэстэ – Давид Ефимов.
2003-2005 сыллаах төрүөх кыргыттарга:
1 миэстэ – Алена Большакова
2 миэстэ – Эмма Софронова
3 миэстэ – Кира Станиславская.
2003-2005 сыл төрүөх уолаттарга:
1 миэстэ – Максим Павлов
2 миэстэ – Саша Алексеев
3 миэстэ – Виталий Заровняев.
2006 сыллаах төрүөх кыргыттарга:
1 миэстэиэстэ – Сандаара Апросимова
2 миэстэ – Анжела Дьячковская
3 миэстэ – Луиза Сергеева.
2006 сыллаах төрүөх уолаттарга:
1 миэстэ – Арсен Михайлов
2 миэстэ – Проня Говоров
3 миэстэ – Алёша Большаков.
Бэтэрээн дьахталларга:
1 миэстэ – Зинаида Саввина (Таатта)
2 миэстэ – Акулина Беляева (Дьокуускай)
3 миэстэ – Мария Бырдыннырова (Дьокуускай).
I лигаҕа оонньообут дьахталларга:
1 миэстэ – Аяника Кычкина (Чурапчы);
2 миэстэ – Ирина Птицына (Амма);
3 миэстэ – Елена Кычкина (Чурапчы).
I лигаҕа оонньообут эр дьоҥҥо:
1 миэстэ – Руслан Колодезников (Горнай);
2 миэстэ – Сергей Сидоров (Горнай);
3 миэстэ – Иван Протопопов (Чурапчы).
Дьахталларга үрдүкү лигаҕа:
1 миэстэ – Мотрёна Ноговицына (Чурапчы);
2 миэстэ – Сайыына Попова (Нам);
3 миэстэ – Наталия Шестакова (Таатта).
Эр дьоҥҥо үрдүкү лигаҕа:
1 миэстэ – Николай Гуляев (Таатта);
2 миэстэ – Иван Токусаров (Ньурба);
3 миэстэ – Николай Никаноров (Дьокуускай).
Түмүккэ, Г.Г. Колесов күрэхтэһиини тэрийсибит бары дьоҥҥо махтал суругу туттартаата, бэйэтин аатыттан анаабыт убаһатын дуобакка уһуйбут тренердэригэр Кычкиннар дьиэ кэргэттэригэр уонна билиҥҥи тренеригэр А. Азаровка бэлэхтээтэ.
Семен Жендринскэй
